खोपोलीतील भटक्या कुत्र्यांचे लसीकरण

व्हीपीडब्ल्यूए संस्थेचा पुढाकार

। खोपोली । प्रतिनिधी ।

दरवर्षी प्रमाणे यंदाही खोपोलीतील भटक्या कुत्र्यांना अँटी रेबीज लस देण्याचे अभियान व्हेटर्नरी प्रॅक्टिशनर्स वेल्फेअर असोसिएशनचे अध्यक्ष डॉ. राहुल मुळेकर यांच्या मार्गदर्शनाखाली, अपघातग्रस्तांच्या मदतीसाठी सामाजिक संस्था, श्री कृपा एक्वेरियम, लायन्स क्लब ऑफ खोपोली, रोट्रॅक्ट क्लब ऑफ खोपोली आणि प्राणी मित्रांच्या माध्यमातून राबवण्यात आले. जवळपास पंधरा दिवस खोपोली शहरातील विवीध भागात हे अभियान राबविण्यात आले होते. यावेळी 700 हून अधिक भटक्या कुत्र्यांना लस देण्यात आली.

आंतरराष्ट्रीय रेबीज दिनाच्या निमित्ताने दरवर्षी लसीकरणाचे अभियान राबवले जाते. यंदाचे हे पाचवे वर्ष होते. मागील वर्षी जवळपास 500 भटक्या कुत्र्यांना लस देण्यात आली होती. यंदा त्याहीपेक्षा जास्त संख्येने लसीकरण करण्याचा संकल्प करण्यात आला होता. त्यानुसार यंदा या अभियानाचा शुभारंभ दि. 6 अ‍ॅक्टोबर रोजी करण्यात आला होता. या निमीत्ताने खोपोली शहरातील भटक्या कुत्र्यांच्या दंशामुळे हबकलेल्या खोपोलीकरांना काहीं प्रमाणात दिलासा मिळाला आहे.

या अभियानासाठी खालापूर तालुक्याचे उपविभागीय पोलीस अधिकारी विक्रांत कदम, खालापूर तालुका पशुवैद्यकीय अधिकारी डॉ. काळे, खोपोली नगर परिषदेचे मुख्याधिकारी डॉ. पंकज पाटील, खोपोलीचे वरिष्ठ पोलीस निरीक्षक शितल राऊत, लायन्स क्लब ऑफ खोपोलीच्या मा. अध्यक्षा शिल्पा मोदी, अपघातग्रस्तांच्या मदतीसाठी सामाजिक संस्थेतर्फे गुरुनाथ साठेलकर आणि विजय भोसले यांच्यासह अनेक सदस्य तसेच शहरातील प्राणी मित्रांनी या मोहिमेत सहभाग घेतला होता. तसेच, श्री कृपा एक्वेरियमचे संचालक प्रवीण शेंद्रे यांनी या मोहिमेत महत्त्वाची भूमिका बजावली होती.

या मोहिमेसाठी हिमालया हेल्दी पेट फूड, ड्रुल्स पेट फूड, ऑरेंज पेट, कार्नीवेल पेट फूड, मिस्टिक इत्यादी कंपन्यांनी डॉग फूड पुरवले होते. तसेच, व्हेटर्नरी प्रॅक्टिशनर्स वेल्फेअर असोसिएशनच्या माध्यमातून लसीकरणाची व्यवस्था करण्यात आली होती. डॉ. राहुल मुळेकर, डॉ. विष्णू काळे, डॉ. प्रशांत बिराजदार, डॉ. आसाराम काळे, डॉ. शशिकांत थोरात व सागर कसबे यांनी प्रत्यक्ष योगदान दिले आहे.