मतदारांना पारदर्शक निष्पक्ष निवडणुकीचा विश्‍वास देता येईल: धिरेंद्रमनी त्रिवेदी

| रायगड | खास प्रतिनिधी |

मतदारांना पारदर्शक निष्पक्ष निवडणुकीचा विश्‍वास देतानाच त्यांना मतदानासाठी मोकळेपणाने सहभागी होण्यासाठी सजग राहून प्रेरणा देता येईल, असे निर्देश भारत निवडणूक आयोगाचे निवडणूक खर्च निरीक्षक धिरेंद्रमनी त्रिवेदी यांनी दिले. जिल्हाधिकारी कार्यालयाच्या नियोजन समिती सभागृहात “जिल्हा निवडणूक खर्च सन नियंत्रण व व्यवस्थापन समिती’’ (डीइएमसी) अंतर्गत प्रशिक्षण व आढावा बैठक संपन्न झाली. याप्रसंगी ते बोलत होते. भारत निवडणूक आयोगाच्यावतीने पारदर्शक, स्वतंत्र, निष्पक्ष निवडणूक प्रक्रिया होण्यासाठी कार्यवाही केली जात असून, यामध्ये सगळ्यांचे सहकार्य आवश्यक आहे. उमेदवाराचा निवडणूक खर्च नोंदविला जाणे गरजेचे आहे. कोणता राजकीय प्रचार खर्च आहे, याचा सद्विवेक बुद्धीने विचार करून कर्तव्य पूर्ण केले जावे, असे त्रिवेदी म्हणाले.

संविधानकर्ते भारतरत्न डॉ. बाबासाहेब आंबेडकर आणि संविधान यांना अभिप्रेत लोकशाहीसाठी निवडणूक यंत्रणेतील आपण त्यांच्याप्रती उत्तरदायी आहोत. निवडणूक कालावधीमध्ये नागरिकांच्या दैनंदिन व्यवहारांना आणि सण उत्सवांना अडचण होणार नाही याचीदेखील काळजी घेतली गेली पाहिजे; परंतु यामध्ये राजकीय उमेदवार व पक्ष निवडणूक निवडणुकीचा प्रचार करत असतील तर त्याच्या सनियंत्रण व देखरेखीचे काम बिनचूक व बारकाईने व्हावे, असे ते म्हणाले. जिल्ह्यामध्ये निवडणूक कालावधीमध्ये होणार्‍या भारतरत्न डॉ.बाबासाहेब आंबेडकर जयंती, श्रीरामनवमी आदी सण उत्सवाच्या पार्श्‍वभूमीवर यंत्रणांनी संतुलितपणे काम करणे गरजेचे आहे. कारवाईशी संबंधित महत्त्वपूर्ण बाबी वरिष्ठ अधिकार्‍यांच्या निदर्शनास आणून त्यांच्या मार्गदर्शनाखाली काम केल्यास अडचणी उद्भवणार नाहीत, असे जिल्हाधिकारी किशन जावळे यांनी सूचना केल्या.

भारत निवडणूक आयोगाच्यावतीने निवडणूक प्रक्रियेची पाहणी करण्यासाठी जिल्ह्यातील प्रचार खर्च, कायदा सुव्यवस्था आदी बाबींची देखरेख करण्यासाठी खर्च निरीक्षक तसेच निवडणूक निरीक्षक दाखल झाले आहेत. ते मतदार संघातील विविध ठिकाणी भेटी देऊन पाहणी करतील. निवडणुका निर्भयपणे होण्यासाठी नियुक्त करण्यात आलेल्या निवडणूक पथकातील अधिकारी कर्मचारी यांनी काळजीपूर्वक कर्तव्य बजावावे, अस जावळे यांनी सांगितले. याप्रसंगी जिल्हा खर्च नियंत्रण समितीचे नोडल अधिकारी कदम यांनी सादरीकरणाद्वारे सहाय्यक खर्च निरीक्षक, भरारी पथके, लेखा पथके, व्हिडिओ निरीक्षण पथक आदी निवडणूक कामकाजासाठी नियुक्त अधिकारी कर्मचारी यांच्यावरील जबाबदार्‍या व नियमानुसार करावयाची कार्यवाही यातील तपशीलवार बारकावे समजावून दिले.

निवडणूक प्रचारासाठी उमेदवारास 95 लाख रुपये मर्यादा असून, तो नियमानुसार होणे गरजेचे आहे. मतदारसंघांमध्ये येणारे स्टार प्रचारक त्यांचा खर्च, आचारसंहिता नियमांचे उल्लंघन, समाज माध्यम, स्थानिक वार्तापत्रातील पेड न्यूज, प्रचारात केला जाणारा कायदेशीर व बेकायदेशीर खर्च, प्रचार वाहने, जाहिराती, पैसा व गैरबाबींचा वापर आदी अनुषंगाने अभ्यासपूर्ण सादरीकरणाद्वारे माहिती देण्यात आली. याप्रसंगी जिल्हा निवडणूक प्रशिक्षण कक्षाच्या नोडल अधिकारी तथा अपर जिल्हाधिकारी जोत्स्ना पडियार, जिल्हा खर्च सनियंत्रण समितीचे नोडल अधिकारी तथा मुख्य लेखा व वित्त अधिकारी राजेंद्र कदम, सर्व विधानसभा मतदारसंघातील सहाय्यक निवडणूक निर्णय अधिकारी, सहाय्यक खर्च निरीक्षक आदी उपस्थित होते.