गोरगरीबांची ढाल बनून लढायचे आहेः चित्रलेखा पाटील

। अलिबाग । प्रतिनिधी ।

आपल्या सर्वांना आणि लाल बावट्याला एक ढाल बनून गोरगरीबांच्या संरक्षणासाठी उभे राहायचे आहे, असे प्रतिपादन शेकाप जिल्हा महिला आघाडी प्रमुख चित्रलेखा पाटील यांनी केले आहे. शेतकरी कामगार पक्ष रायगड जिल्हा पक्ष संघटना आणि विविध जन आघाड्यांचा पदाधिकारी निवड मेळावा रविवारी (दि.18) सायंकाळी पेझारी येथील भैरवनाथ युवक मंडळ पटांगणात आयोजित करण्यात आला होता. त्या‍वेळी त्‍या बोलत होत्‍या.

त्या पुढे म्हणाल्या की, आपल्यासमोर प्रश्न खूप आहेत; परंतु, आपल्यासमोरची माणसे काही ठिक नाहीत. तालुक्याचे विद्यमान आमदारांचा बॉडीगार्ड दरोडेखोर, चालक विनयभंगाच्या केसमध्ये अडकलेला आहे. आमदारांकडून पत्रकारांचाही आवाज दाबण्याचा प्रयत्न केला जात आहे. पोलीस यंत्रणेला सांगायचे आहे, की तुम्ही सिंघम आहात. तुम्ही घाबरु नका. तुम्ही कायद्यात खरे आहे तेच करा आणि गोरगरीबांच्या पाठीशी उभे राहा. पक्षासाठी चीड, पक्षासाठी प्रेम असणारे निष्ठावान कार्यकर्ते आज याठिकाणी उपस्थित आहेत. आज पक्ष नव्या दमाने, नव्या उमेदीने उभा राहील, असा विश्वासही त्यांनी व्यक्त केला आहे. तसेच, शेतकरी कामगार पक्षासाठी हा मेळावा फार महत्त्वाचा आहे. जुन्या-नव्या पदाधिकारी आणि कार्यकर्त्यांची सांगड घालून ज्यांची ज्यांची नियुक्ती करण्यात आली आहे, त्याचा मला आनंद आहे. त्यामुळे आता जुन्या-नव्या पदाधिकाऱ्यांची जबाबदारी वाढली आहे. रायगडात नवनव्या डेव्हलपमेंट येत असताना इथल्या भूमीपुत्रावर अन्याय होणार नाही, यासाठी त्यांच्या पाठीशी उभे राहायचे आहे. शेतकरी कामार पक्षाचा सुवर्ण इतिहास होता. तो पुन्हा मिळवून देण्याची जबाबदारी आपली असून, त्यासाठी त्वेषाने, चिडीने काम करायचे आहे, असेही त्या म्हणाल्या.