| पनवेल | प्रतिनिधी |
पनवेल महानगरपालिकेच्या परिवहन विकास आराखड्यातील 100 इलेक्ट्रिक बसच्या प्रस्तावावर महाविकास आघाडीचे नगरसेवक लतीफ शेख यांनी महासभेत आक्रमक भूमिका घेतली. सीएनजी आणि इलेक्ट्रिक बसच्या खरेदीपासून देखभाल व परिचालन खर्चापर्यंतचा तुलनात्मक अभ्यास सादर केल्याशिवाय कोट्यवधी रुपयांच्या खर्चाचा निर्णय घेऊ नये, अशी मागणी त्यांनी केली.
एकाच वेळी 100 इलेक्ट्रिक बस खरेदी करण्याऐवजी प्रथम 25 सीएनजी बस सुरू कराव्यात. प्रवाशांचा प्रतिसाद, मार्गांची गरज आणि परिचालन खर्चाचा आढावा घेऊन पुढील निर्णय घ्यावा, असे शेख यांनी सुचवले.
‘अर्बन मास ट्रान्झिट’ कंपनीने तयार केलेल्या परिवहन विकास आराखड्यात सीएनजी आणि इलेक्ट्रिक बसच्या खर्चाची, उपयुक्ततेची आणि दीर्घकालीन आर्थिक व्यवहार्यतेची तुलना सभागृहासमोर मांडण्यात आली नसल्याचा आक्षेप शेख यांनी घेतला. बस खरेदी, इंधन व वीज खर्च, देखभाल, बॅटरी बदलण्याचा संभाव्य खर्च आणि चार्जिंग सुविधांसाठी लागणारी गुंतवणूक यांचा सविस्तर अहवाल प्रशासनाने सादर करावा, अशी मागणी त्यांनी केली. शहरातील वाहतूक समस्या, प्रवाशांची संख्या, बसमार्ग, थांबे आणि नागरिकांच्या गरजांचा विचार करून आराखडा तयार होणे आवश्यक आहे. मात्र, आराखडा तयार करताना सत्ताधारी आणि विरोधी नगरसेवकांना विश्वासात घेतले नसल्याबद्दल शेख यांनी नाराजी व्यक्त केली.
पनवेलकरांना दर्जेदार, नियमित आणि परवडणारी सार्वजनिक वाहतूक सेवा मिळाली पाहिजे. मात्र, करदात्यांच्या पैशांचा विनियोग करताना आर्थिक व्यवहार्यता आणि पारदर्शकतेला प्राधान्य द्यावे. प्रशासनाने खर्चाचा संपूर्ण हिशेब सादर करून नगरसेवकांना विश्वासात घ्यावे, अशी भूमिका त्यांनी मांडली. आता 100 इलेक्ट्रिक बसच्या प्रस्तावावर अंतिम निर्णय घेताना प्रशासन सीएनजी बसच्या पर्यायाचा आणि खर्चाचा वस्तुनिष्ठ विचार करणार का, याकडे पनवेलकरांचे लक्ष लागले आहे.
पनवेलकरांच्या पैशांची उधळपट्टी खपवून घेणार नाही
