तटकरेंच्या मदतीची गॅरंटी कोण घेणार?

घटक पक्षातून विश्‍वासार्हतेवरच प्रश्‍नचिन्ह; शिंदे, राष्ट्रवादी गट आमनेसामने

| रायगड | खास प्रतिनिधी |

आगामी होऊ घातलेल्या विधानसभेच्या निवडणुकीत घटक पक्षातील उमेदवारांना निवडून आणण्यासाठी सुनील तटकरे मदत करतील यांची गॅरंटी कोण घेणार, असा परखड सवाल शिंदे गटाचे कर्जतचे आमदार महेंद्र थोरवे यांनी विचारला आहे. तटकरेंनी महायुती धर्म पाळला नाही, तर आम्ही त्यांचा कडेलोट करु, असेही आमदार थोरवे यांनी स्पष्ट केले आहे. महायुतीचे संभाव्य उमेदवार म्हणून राष्ट्रवादी काँग्रेसचे (अजित पवार गट) माजी खासदार सुनील तटकरे यांच्या नावाची चर्चा आहे. मात्र, त्यांच्या उमेदवारीला महाड आणि कर्जत विधानसभा मतदारसंघातील आमदारांनी विरोध केला आहे. तटकरेंच्या विश्‍वासार्हतेवरच प्रश्‍नचिन्ह उपस्थित केले जात असल्याने महायुतीमध्ये नक्कीच काही, तरी बिनसले आहे.

शिंदे गटाचे आमदार आणि राष्ट्रवादी काँग्रेसचे पदाधिकारी हे एकमेकांवर राजकीय चिखलफेक करत आहेत. त्यामुळे लोकसभा निवडणुकीत दगाफटका होण्याची संभावना त्यानिमित्ताने निर्माण झाल्याचे दिसून येते. लोकसभा निवडणुकीच्या पार्श्‍वभूमीवर शिंदे गटाने पेण येथे जिल्हा कार्यकारिणी आढावा बैठक बोलावली होती. यावेळी कर्जतचे आ. महेंद्र थोरवे यांनी तटकरे यांच्यावर जोरदार टीका केली. तटकरेंना आम्ही लोकसभेच्या निवडणुकीत निवडून आणण्यासाठी आम्ही मदत करु, मात्र आगामी विधानसभेच्या निवडणुकीत ते मदत करतील याची गॅरंटी कोण घेणार, त्यांच्यावर कोण विश्‍वास ठेवणार, असा संशय थोरवेंनी उपस्थित करत तटकरेंचा कडेलोट करण्याची भाषा केली.

वरिष्ठ नेत्यांवर घटक पक्षाकडूनच शाब्दिक हल्ले केले जात असल्याने राष्ट्रवादीचे पदधिकारी सुधाकर घारे यांनी महेंद्र थोरवे यांच्या वक्तव्याचा निषेध करण्यात आला आहे. कडेलोट करण्याची कोणी भाषा करत असेल, तर त्याला हत्तीच्या पायाखाली चिरडून टाकू, असा पलटवार घारे यांनी केला आहे. थोरवेंना आमदारकी अपघाताने मिळाली असल्याची टीका घारे यांनी केली. थोरवेंच्या कृतीबाबत मुख्यमंत्री एकनाथ शिंदे, सुनील तटकरे यांना कळवणार असल्याचे घारे यांनी स्पष्ट केले.

महाड विधानसभा मतदारसंघातील आमदारपुत्र विकास गोगावले यांनी रायगड लोकसभेवर हक्क सांगितला आहे. त्यामुळे तटकरेंना निवडून आणण्यासाठी आमदार भरत गोगावले हे प्रामाणिक प्रयत्न करणार का, असा प्रश्‍न आहे. रायगड लोकसभा मतदारसंघामध्ये कर्जत विधानसभा मतदारसंघ येत नाही. मात्र, विधानसभा निवडणुकीत थोरवेंना तटकरेंची मदत मिळणार नसल्याची खात्री वाटत असल्यानेची त्यांनी शंका उपस्थित केली आहे. दरम्यान, शिंदे गट आणि राष्ट्रवादी अजित पवार गटामध्ये त्यानिमित्ताने चांगलीच राजकीय धुळवड पाहायला मिळत आहे.