फिफा विश्वचषकातून इराणची माघार?

| नवी दिल्ली | वृत्तसंस्था |

आखातामध्ये सुरू असलेल्या युद्धाचा मोठा परिणाम तीन महिन्यानंतर सुरू होणाऱ्या आणि सहयजमान अमेरिकेत होत असलेल्या विश्वकरंडक फुटबॉल स्पर्धेवर होण्याची शक्यता आहे. मात्र, स्पर्धेसाठी पात्र ठरलेल्या इराणचा सहभागच अनिश्चित झाला आहे.

फिफा विश्वकरंडक फुटबॉल स्पर्धा 15 जूनपासून सुरू होत आहे. अमेरिका, कॅनडा आणि मेक्सिको या देशांत मिळून 104 सामने होणार आहेत. त्यात इराण त्यांचे तीन साखळी सामने अमेरिकेत, दोन दोन सामने इंगलवूड, कॅलिफोर्निया आणि सिएटल येथे खेळणार आहेत. यादरम्यान, आमच्याविरुद्ध एवढे मोठे युद्ध सुरू केल्यानंतर आणि सर्वोच्च नेत्यांसह अनेकांची हत्या केल्यानंतर आम्ही विश्वकरंडक स्पर्धेत सहभागी होऊ, असे वाटत नाही, असे इराणच्या फुटबॉल संघटनेचे महत्त्वाचे अधिकारी मेहदी ताज यांनी सांगितले. मेहदी हे आशिया फुटबॉल महासंघाचेही अध्यक्ष आहेत. इराण हा आशिया फुटबॉलमधील सर्वात ताकदवर संघ आहे. गेल्या आठपैकी 6 विश्वकरंडक स्पर्धांसाठी त्यांचा संघ पात्र ठरलेला आहे. फिफाची क्रमवारी 211 संघांची आहे, त्यात इराणचा संघ 20व्या स्थानी आहे. फुटबॉल विश्वातील या सर्वात मोठ्या स्पर्धेसाठी इराण आपला संघ पाठवणार नाही, की अमेरिका सरकार या संघावर बंदी घालून त्यांना आपल्या देशात प्रवेशबंदी करणार, हे स्पष्ट झालेले नाही. आम्ही परिस्थितीवर लक्ष ठेवून आहोत, असे सांगत फिफाचे सरचिटणीस मथाईस ग्राफस्टॉर्म यांनी कोणतेही थेट भाष्य करण्यास नकार दिला.