जनतेच्या मुलभूत प्रश्‍नांसाठी शेकाप आवाज उठविणार

आ.जयंत पाटील यांचा इशारा; गडचिरोलीत जाहीर सभा

| गडचिरोली | प्रतिनिधी |

राज्य आणि केंद्रातील सत्ताधार्‍यांचे जनतेच्या मुलभूत समस्या सोडविण्याकडे दुर्लक्ष होत आहे. त्यासाठी जनहिताच्या प्रश्‍नांसाठी शेतकरी कामगार पक्ष आवाज उठविल्याशिवाय राहणार नाही, असा इशारा शेकाप सरचिटणीस आ.जयंत पाटील यांनी गडचिरोलीत येथे दिला.

शेकापच्या मध्यवर्ती समितीची दोन दिवसीय बैठक आयोजित करण्यात आली होती. यावेळी झालेल्या जाहीर सभेत ते बोलत होते. पक्षाचे नेते प्रा.एस.व्ही.जाधव, अ‍ॅड. राजेंद्र कोरडे, जिल्हा चिटणीस रामदास जराते, जयश्री वेळदा, जिल्हा खजिनदार श्यामसुंदर उराडे, युवक आघाडीचे जिल्हाप्रमुख अक्षय कोसनकर, जिल्हा परिषद सदस्य सैनू गोटा, पंचायत समिती सदस्य शीला गोटा, तुकाराम गेडाम, सावित्री गेडाम, दर्शना भोपये, माकपचे जिल्हा चिटणीस अमोल मारकवार यावेळी उपस्थित होते.

आ.जयंत पाटील पुढे म्हणाले, गडचिरोली जिल्ह्यात नैसर्गिक साधनसंपत्ती विपूल प्रमाणात आहे. त्यावरच आदिवासींची उपजीविका चालते. परंतु भांडवलदारांमार्फत लोहखनिज उत्खनन करुन आदिवासींचा रोजगार हिरावला जात आहे, त्यासाठी पेसा कायदा आणि ग्रामसभांचे अधिकार नाकारले जात आहेत. प्रशासन आणि पोलिस नागरिकांचा आवाज दाबण्याचा प्रयत्न करीत असून, पर्यावरणविषयक जनसुनावणीही दडपशाहीने करण्यात आली. याविरोधात आपण अधिवेशनात आवाज उठविणार असून, वेळप्रसंगी उच्च न्यायालयात जाऊ, असे ते म्हणाले.

जिल्ह्यात आदिवासींच्या साधनसंपत्तीची लूटमार केली जात आहे. अधिकारी तस्करांना पाठीशी घालत आहेत, हे खपवून घेणार नाही, असा इशारा देत त्यांनी रेती तस्करांवर मोक्का कायद्यान्वये कारवाई करावी, अशी मागणीही केली.

पेसा कायद्यामुळे आदिवासींना राजकीय संरक्षण मिळालं आहे. परंतु ओबीसींवर वारंवार अन्याय केला जात आहे. मात्र त्याकडे केंद्र आणि राज्य शासन ओबीसींचे राजकीय आरक्षण पूर्ववत करण्यास वेळकाढू धोरण अवलंबित आहे. हे आरक्षण मिळवून देऊन ओबीसींना राजकीय संरक्षण देण्यासाठी शेतकरी कामगार पक्षाची बांधिलकी असल्याचे पाटील म्हणाले. मच्छिमारी करणार्‍या ढिवर समाजाला मासेमारी करण्यासाठी विविध योजना राबवून त्यांना भरघोस सबसिडी देण्याची मागणीही त्यांनी केली.

मेडिगड्डा धरणामुळे सिरोंचा तालुक्यातील 12 गावांतील नागरिक उपोषणाला बसले आहेत. बाधित शेतकर्‍यांची जमीन संपादित करताना त्यांना योग्य मोबदला मिळाला पाहिजे, अशी शेतकरी कामगार पक्षाची भूमिका असून, त्यासंदर्भात अधिवेशनात प्रश्‍न उपस्थित करु, शिवाय तेलंगणाच्या मुख्यमंत्र्यांशीही स्वत: बोलू, असे आ.पाटील म्हणाले. कार्यक्रमाचे संचालन अमोल मारकवार, तर प्रास्ताविक रामदास जराते यांनी केले.

गडचिरोलीत पेसा आणि ग्रामसंभाविषयक कायदे पायदळी तुडवून सुरजागड येथे लोहखनिज उत्खनन करण्यात येत आहे. हे बेकायदेशीर असून, त्याविरोधात विधिमंडळाच्या हिवाळी अधिवेशनात आवाज उठविणार.

आमदार जयंत पाटील
शेकाप सरचिटणीस