डंपरखाली चिरडून महिलेचा मृत्यू

| रायगड | जिल्हा प्रतिनिधी |

अलिबाग तालुक्यातील परहूर येथील एमआयडीसी रस्त्यावर भीषण अपघात झाला. या अपघातामध्ये डंपरच्या चाकाखाली चिरडून एका महिलेचा मृत्यू झाला. ही घटना शनिवारी (दि.25) सकाळी घडली. परहूरकडून अलिबागकडे येत असताना चालकाचा ताबा सुटल्याने दुचाकी घसरली. दुचाकीवर बसलेली महिला खाली पडली. मात्र रस्त्याने जाणाऱ्या डंपरच्या चाकाखाली महिला चिरडल्याने तिचा मृत्यू झाला, अशी माहिती पोलिसांनी दिली.

या घटनेची माहिती पोलिसांना मिळताच पोलीस निरीक्षक किशोर साळे, जिल्हा वाहतूक शाखेच्या पोलीस निरीक्षक सरिता चव्हाण यांनी घटनास्थळी धाव घेतली. मृतदेह ताब्यात घेऊन अलिबागमधील जिल्हा रुग्णालयात शवविच्छेदनासाठी पाठविण्यात आला आहे. पोलिसांनी दिलेल्या माहितीनुसार, मृत महिला रोहा येथील असून तिचे वय 53 वर्षे आहे.