अंत्यविधीला जाताना अपघात; डंपरखाली चिरडून महिलेचा मृत्यू

| रायगड | जिल्हा प्रतिनिधी |

अलिबाग तालुक्यातील परहूर येथील एमआयडीसी रस्त्यावर भीषण अपघात झाला. या अपघातामध्ये डंपरच्या चाकाखाली चिरडून दुचाकीवरील महिलेचा मृत्यू झाला. ही दुर्घटना शनिवारी (दि.25) सकाळी घडली. मुशेतमध्ये एका नातेवाईकांच्या घरी अंत्यविधीच्या कार्यक्रमाला जात असताना हा अपघात झाल्याची माहिती समोर येत आहे.

पोलिसांकडून मिळालेल्या माहितीनुसार, मल्लिका अब्दूल नुरजी (वय – 53, रा. रोहा) असे या मृत महिलेचे नाव आहे. ही महिला त्यांच्या मुलाच्या दुचाकीवरून शनिवारी सकाळी अलिबाग तालुक्यातील मुशेत येथील भावाच्या अंत्यविधीला जात होती. दुचाकीवरून कार्लेखिंडमार्गे एमआयडीसी रस्त्यावरून जात असताना ओव्हान बंगला येथे आल्यावर सकाळी दहा वाजण्याच्या सुमारास दुचाकी चालकाचा ताबा सुटला. त्यामुळे दुचाकी घसरून महिला दुचाकीवरून खाली पडली. दरम्यान जलपाडाकडे जाणाऱ्या एका डंपरच्या चाकाखाली महिला चिरडली. या भीषण अपघातामध्ये महिलेचा जागीच मृत्यू झाला.

या घटनेची माहिती पोलिसांना मिळताच पोलीस निरीक्षक किशोर साळे, जिल्हा वाहतूक शाखेच्या पोलीस निरीक्षक सरिता चव्हाण यांनी घटनास्थळी धाव घेतली. मृतदेह ताब्यात घेऊन अलिबागमधील जिल्हा रुग्णालयात शवविच्छेदनासाठी पाठविण्यात आला.