बैठकीनंतरही प्रश्न अधांतरीच, आंदोलक नाराज
| दिघी | वार्ताहर |
श्रीवर्धन तालुक्यातील दिघी येथील मासे विक्री करणाऱ्या महिलांना व्यवसाय करण्यास मासळी बाजाराची सुविधा नाही. सातत्याने मागणी होत असताना रस्त्यावर विक्री करत जीवघेणा संघर्ष करावा लागत आहे. या महिलांच्या हाकेला कुणीच प्रतिसाद देत नसल्याने अखेर गुरुवारी शेकडोंच्या संख्येने महिलांनी दिघी पोर्टवर मोर्चा काढला. त्यानंतर झालेल्या बैठकीत कोणताच तोडगा न निघाल्याने आंदोलकांनी नाराजी व्यक्त केली.
दिघी किनारपट्टीवर नागरिकांचा मासेमारी हा प्रमुख व्यवसाय असला, तरी सुविधायुक्त मासळी बाजाराची कमतरता आहे. येथील ‘आई एकवीरा ओली सुकी मच्छी विक्रेता’ ही महिलांची सामाजिक संस्था असून, या संस्थेतील दोनशेहून अधिक महिलांचा मासेमारी प्रमुख व्यवसाय आहे. या व्यवसायावर आपले कुटुंब चालविणाऱ्या महिलांना मासे विकण्यासाठी जागा उपलब्ध नाही. त्यामुळे सातत्याने त्यांच्याकडून मागणी करण्यात येत आहे.
या परिसराचा औद्योगिक क्षेत्र तसेच पर्यटन स्थळ म्हणून वाढता आवाका आहे. याठिकाणी सुसज्ज मासळी बाजाराची सुविधा मिळावी यासाठी स्थानिक संस्थेच्या हद्दीतील मेरिटाईम बोर्ड, दिघी पोर्ट, महाराष्ट्र पर्यटन विकास महामंडळ यांच्या परवानगीने जागा उपलब्ध होण्यासाठी कागदोपत्रांची पूर्तता करण्यात आली आहे. मात्र सीआरझेडची परवानगी नसल्याचे कारण दिघी पोर्ट व्यवस्थापन पुढे करत आहे. स्थानिकांच्या मागणीकडे सातत्याने दुर्लक्ष करण्यात येत असल्याचे संघटनेकडून सांगण्यात आले.
दिघी कोळी बांधवांच्या मोर्चानंतर समन्वयाची बैठक घेण्यात आली. त्यामध्ये दिघी पोर्टचे अधिकारी उपस्थित राहून चर्चा करण्यात आली. सीआरझेड परवानगी शिवाय समुद्रकिनारी बांधकाम करता येणार नाही. पर्यायी जागा सुचविल्यास निर्णय घेता येईल. सदर मागणीनुसार वरिष्ठांना कळविण्यात येईल. असे दिघी पोर्ट प्रशासनाकडून सांगण्यात आले.
दिघी ग्रामपंचायत समोरील सुचवलेल्या जागेत मासे विक्रिसाठी बाजार झाले पाहिजे. तशी आमची ठाम मागणी आहे. संपूर्ण दिघी पोर्ट समुद्रात उभे असून, सीआरझेडची परवानगी फक्त आम्हा सर्वसामान्यांना करता केली आहे का.
किरण कांदेकर, दिघी कोळी समाज अध्यक्ष