ऑस्ट्रेलियाच्या विजयाचा झाला मोठा फायदा
| नवी दिल्ली | वृत्तसंस्था |
पहिल्या कसोटी सामन्यात ऑस्ट्रेलियाने न्यूझीलंडचा 172 धावांनी पराभव केला. यासह ऑस्ट्रेलियन संघाने मालिकेत 1-0 अशी आघाडी घेतली आहे. या सामन्यात ऑस्ट्रेलियासाठी गोलंदाज आणि फलंदाजांनी अप्रतिम कामगिरी केली. कॅमेरून ग्रीनने फलंदाजीचे उत्कृष्ट उदाहरण मांडले आणि त्याच्यामुळेच ऑस्ट्रेलियन संघ सामना जिंकण्यात यशस्वी ठरला. त्याने या सामन्यात 174 धावांची खेळी केली. पण ऑस्ट्रेलियाच्या विजयाचा भारतीय संघाला मोठा फायदा झाला आहे. भारतीय संघ जागतिक कसोटी चॅम्पियनशिप गुणतालिकेत पहिल्या क्रमांकावर पोहोचला असून न्यूझीलंडची घसरण झाली आहे.
डब्ल्यूटीसी पॉइंट टेबलमध्ये भारताने पटकावले अव्वल स्थान ऑस्ट्रेलियाविरुद्धचा सामना गमावल्यानंतर न्यूझीलंड संघाने जागतिक कसोटी चॅम्पियनशिपच्या गुणतालिकेतील अव्वल स्थान गमावले आहे. न्यूझीलंडचा संघ दुसर्या क्रमांकावर घसरला आहे. भारतीय संघाने नंबर एकचा मुकुट पटकावला आहे. या पराभवामुळे न्यूझीलंडचे 60 टक्के गुण झाले आहेत. भारतीय संघाचे 64.58 गुण आहेत. मात्र विजयानंतरही ऑस्ट्रेलियन संघ तिसर्या क्रमांकावर कायम आहे. कांगारु संघाचे 59.09 टक्के गुण आहेत.
इंग्लंडविरुद्ध भारताची दमदार कामगिरी भारतीय संघाने जागतिक कसोटी चॅम्पियनशिप 2023-25 मध्ये आतापर्यंत 8 सामने खेळले आहेत, त्यापैकी संघाने 5 जिंकले आहेत आणि 2 सामने गमावले आहेत. एक कसोटी सामना अनिर्णित राहिला. टीम इंडिया सध्या घरच्या मैदानावर इंग्लंडविरुद्ध पाच कसोटी सामन्यांची मालिका खेळत आहे. भारताने या मालिकेत आधीच 3-1 अशी अभेद्य आघाडी मिळवली आहे. डब्ल्यूटीसी पॉइंट टेबलमध्ये पहिल्या क्रमांकावर राहण्यासाठी टीम इंडियाला इंग्लंडविरुद्धचा पाचवा कसोटी सामना कोणत्याही किंमतीत जिंकावा लागेल. दुसरीकडे, न्यूझीलंड संघाने डब्ल्यूटीसी 2023-25 मध्ये 5 सामने खेळले आहेत, त्यापैकी संघाने 3 जिंकले आहेत आणि 2 सामने गमावले आहेत.
न्यूझीलंडचा 172 धावांनी पराभव ऑस्ट्रेलियाविरुद्धच्या कसोटी सामन्यात न्यूझीलंड संघाने प्रथम गोलंदाजी करण्याचा निर्णय घेतला होता. जो चुकीचा सिद्ध झाला. ऑस्ट्रेलियाने पहिल्या डावात 383 धावा केल्या होत्या. कॅमेरून ग्रीनने संघाकडून 174 धावांची खेळी केली. मिचेल मार्शने 40 धावांचे योगदान दिले. जोश हेझलवूडने 22 धावा केल्या. न्यूझीलंडचा संघ पहिल्या डावात अवघ्या 179 धावांत सर्वबाद झाला होता. ऑस्ट्रेलियाने न्यूझीलंडला 369 धावांचं लक्ष्य दिलं होते, प्रत्युत्तरात न्यूझीलंडचा संघ 196 धावांवर गारद झाला.