पिवळा धम्मक बहावा पर्यटकांचे आकर्षण

। आगरदांडा । प्रतिनिधी ।
कडक अशा उन्हात बहावा वृक्षाला पिवळी धम्मक फुले फुलण्याचा वार्षिक क्रम असतो.साधारणतः एप्रिल महिन्याच्या 25 तारखेनंतर या वृक्षांना पिवळी झुबकेदार फुले येत असतात. सध्या ही पिवळी धम्मक फुले पर्यटक व स्थानिक नागरिकांचे आकर्षण ठरत आहे. फणसाड अभयारण्य परिक्षेत्रात तसेच मुरुड-मुंबई या मुख्य रस्त्यावर काही प्रमाणात ही फुले फुलली आहेत.
बहावा या वृक्षाचे शास्त्रीय नाव कॅशिया फिस्तुला हे आहे. बहावा या वृक्षाची उंची 8 ते 10 मीटरपर्यंत असते. म्हणजेच, हे झाड जास्त उंच वाढत नाही. त्यामुळे जमिनीपासून अगदी थोड्याच अंतरावर फुलणारी फुले खूप मनमोहक दिसतात. या वृक्षावर येणारी फुले ही अर्धा हात लांब लोंबणारी असतात. पिवळ्या धम्मक फुलांमुळे या वृक्षास गोल्डन शॉवर ट्री असेसुद्धा संबोधले जाते.
मुरुड येथून जाणार्‍या रस्त्यावर या वृक्षाची फुले अगदी मनभरून पाहण्यासाठी पर्यटक खास गाडी थांबवतात. बहावा या वृक्षाला फुले आल्यावर पावसाचे आगमन लवकर होणार, हे अभिप्रेत धरले जाते. बहावा या वृक्षाला पिवळी फुले फुलल्याने पर्यटक व स्थानिक नागरिक यांचे या झाडाने लक्ष वेधले आहे.पिवळी सोनेरी फुले पाहण्यासाठी लोक या झाडाकडे कौतुकाने पाहताना दिसत आहेत. विहूर परिसरात फुलांनी बहरलेला हा वृक्ष दिसत आहे.