योगेश टेमकरांना पोलीस महासंचालक पदक

| खरोशी | प्रतिनिधी |

महाराष्ट्र पोलीस दलात आपल्या कर्तव्याचा दरारा आणि सेवाभावाचा ठसा उमटवणाऱ्या निवडक शिलेदारांचा दरवर्षी सन्मान केला जातो. सन 2025 च्या अत्यंत प्रतिष्ठेच्या पोलीस महासंचालक सन्मानचिन्ह पदकावर रायगड पोलीस दलाचे रत्न आणि सध्या बोरघाट वाहतूक विभागात कार्यरत असलेले पोलीस हवालदार योगेश टेमकर यांनी आपले नाव कोरले आहे. नवी मुंबई येथे पार पडलेल्या एका सोहळ्यात अप्पर पोलीस महासंचालक (वाहतूक) प्रवीण साळुंखे (आयपीएस) यांच्या हस्ते टेमकर यांना हे पदक प्रदान करून गौरविण्यात आले.

शहाबाज-कमळपाडा या छोट्याशा गावातून पोलीस दलात दाखल झालेल्या योगेश टेमकर यांचा 28 वर्षांचा सेवाकाळ म्हणजे शिस्त आणि कष्टाचा चालता-बोलता इतिहास आहे. खाकी वर्दीची शान राखताना त्यांना मिळालेली 151 बक्षिसे हा केवळ आकडा नसून, त्यांच्या प्रामाणिकपणावर उमटलेली सरकारी मोहोर आहे. टेमकर यांची ओळख केवळ एक पोलीस अंमलदार म्हणून नाही, तर गुन्हेगारांना जरब बसवणारे एक चाणाक्ष व्यक्तिमत्व म्हणून आहे. खून, जबरी चोरी आणि घरफोडी यांसारख्या सात अत्यंत गंभीर गुन्ह्यांमध्ये त्यांनी आरोपींना प्रत्यक्ष शिक्षा मिळवून देण्यात महत्त्वाची भूमिका बजावली आहे.