कोयत्याने वार करून तरुणाची हत्या

। पुणे । प्रतिनिधी ।

मावळ तालुक्यात अनैतिक संबंधांच्या संशयातून एकाने 22 वर्षीय तरुणावर कोयत्याने मानेवर वार करून हत्या केल्याची धक्कादायक घटना समोर आली. ही घटना मंगळवारी (दि.1) सायंकाळी पावणेआठच्या सुमारास शनि मंदिराजवळ आंबेवाडी कान्हे येथे घडली. या घटनेने परिसरात खळबळ उडाली.

वैभव उमेश सातकर (22) असे तरुणाचे नाव असून अंकुश जयवंत सातकर (42) असे आरोपीचे नाव आहे. वडगाव मावळ पोलिसांनी दिलेल्या माहितीनुसार, मयत वैभव सातकर व आरोपी अंकुश सातकर दोघे शेजारी राहत  होते. वैभव याचे अनैतिक संबंध असल्याचा संशय अंकुश याला होता. याच रागातून त्याने वैभवच्या मानेवर कोयत्याने वार केले. यात गंभीर जखमी झाल्याने वैभवचा जागीच मृत्यू झाला, तर अंधाराचा फायदा घेत आरोपी तेथून पसार झाला.

या घटनेची माहिती मिळताच वडगाव पोलीस स्टेशनच्या पोलिसांनी धाव घेत पंचनामा करून मृतदेह ताब्यात घेतला. त्यानंतर मृतदेह शवविच्छेदन करण्यासाठी प्राथमिक आरोग्य केंद्रात रवाना केला. याप्रकरणी पुढील तपास वडगाव मावळ पोलीस करत आहेत.