एका सेल्फीसाठी मृत्यूशी झुंज; सोलो ट्रेकरच्या बेफिकीर धाडसाने यंत्रणा लागली कामाला

केपी धबधब्यावर अडकलेल्या युवकाची सुखरूप सुटका

। खोपोली । प्रतिनिधी ।

खोपोलीतील प्रसिद्ध केपी वॉटर फॉल येथे बुधवारी (दि.8) मुंबईतील एक 18 वर्षीय सोलो ट्रेकर अडकून पडला होता. याबाबत माहिती मिळताच हेल्प फाउंडेशनने थरारक मोहीम राबवित तरुणाची सुखरूप सुटका केली.

गेल्या काही दिवसात महाराष्ट्रात अतिवृष्टीने हाहाकार माजवला आहे. डोंगरदऱ्या धुक्याने व्यापल्या आहेत, नद्या दुथडी भरून वाहत असून धबधबे रौद्ररूप धारण करत आहेत. प्रशासन, हवामान विभाग आणि आपत्ती व्यवस्थापन यंत्रणा सातत्याने नागरिकांना अत्यावश्यक कामाशिवाय घराबाहेर पडू नका, असे आवाहन करत आहेत. मात्र सोशल मीडियासाठी फोटो, व्हिडिओ आणि थरार अनुभवण्याच्या हव्यासापोटी काही पर्यटक अजूनही जीवाशी खेळ करत असल्याचे चित्र आहे. अशाच एका तरुणाच्या बेफिकीर निर्णयामुळे खोपोलीतील प्रसिद्ध केपी वॉटर फॉल परिसरात बुधवारी संध्याकाळी थरारक बचाव मोहीम राबवावी लागली. मोहम्मद जुहेर शेख या 18 वर्षीय युवकाच्या हट्टामुळे पोलीस, आपत्कालीन यंत्रणा आणि हेल्प फौंडेशनच्या सदस्यांना मुसळधार पावसात स्वतःचा जीव धोक्यात घालून डोंगरमाथ्यावर चढावे लागले.

मुंबईतील कुर्ला येथे राहणारा हा युवक बुधवारी सकाळी सुमारे अकरा वाजता घरच्यांना कोणतीही माहिती न देता एकटाच लोकल रेल्वेने खोपोलीत दाखल झाला. मोबाईलवर मिळालेल्या लोकेशनच्या आधारे तो प्रथम झेनिथ वॉटर फॉल परिसरात पोहोचला. धबधब्याचे रौद्र सौंदर्य पाहून तो भारावून गेला. मात्र तेवढ्यावर समाधान न मानता त्याने आणखी धोकादायक असलेल्या केपी वॉटर फॉलच्या उगमाकडे जाण्याचा निर्णय घेतला. निसरडी चढण, उभा कातळ, दाट झाडी आणि डोंगरमाथ्यावरून कोसळणाऱ्या पाण्याचा प्रचंड प्रवाह त्यातही असतानाही तब्बल तीन तास संघर्ष करत तो धबधब्याजवळ पोहोचला. तेथे त्याने सेल्फी काढली, छायाचित्रण केले, सोबत आणलेले खाद्यपदार्थ संपवले आणि समाधानाने परतीचा मार्ग धरला.

परंतु, सायंकाळी साडेचारच्या सुमारास परतताना त्याचा पाय घसरला आणि तो जोरात कातळावर आदळला. यात त्याला दुखापत झाली आणि चालणे अवघड झाले. आजूबाजूला मदतीसाठीही कोणी नव्हते. घरच्यांना काही न सांगता आल्याची खंत आणि जीव वाचेल की नाही, याची भीती त्याला सतावू लागली. त्याचवेळी त्याने मोबाईलवर मदतीचा मार्ग शोधला आणि 112 या आपत्कालीन हेल्पलाइनवर संपर्क साधला. त्याच्या हेल्पलाइनवरील एका फोन कॉलने संपूर्ण यंत्रणा सतर्क झाली. खोपोली पोलीस स्टेशनचे पोलीस निरीक्षक सचिन हिरे, पोलीस हवालदार धनाजी रूपनवर आणि बीट मार्शल यांनी तातडीने परिस्थितीचा आढावा घेत हेल्प फाउंडेशनशी संपर्क साधला.

सायंकाळी पाचच्या सुमारास हेल्प फाउंडेशनचे प्रशिक्षित बचाव पथक त्या युवकाच्या दिशेने रवाना झाले. मात्र पुढील काही तास हे त्या युवकासाठी आणि बचाव पथकासाठी परीक्षा घेणारे ठरले. भरधाव वेगाने कोसळणारे धबधबे, कमरेपर्यंत वाहणारे पाण्याचे प्रवाह, चिखलाने निसरडे झालेले कातळ आणि सतत खंडित होणारे मोबाईल नेटवर्क यामुळे युवकाचे अचूक लोकेशन शोधणे कठीण बनले होते. अंधार वाढत होता आणि बचाव मोहिमेची जोखीमही वाढत होती. तर जखमी युवकाचा धीर सुटत चालला होता. तो प्रत्येक फोन कॉलमध्ये ‘मला वाचवा… लवकर या…’ अशी विनवणी करत होता. त्यानुसार बचाव पथक आणखी वेगाने पुढे सरकत होते.

अखेर अनेक अडथळे पार करत हेल्प फाउंडेशनचे सदस्य त्याच्यापर्यंत पोहोचले. टीमने त्याला प्रथम पाणी आणि खाद्यपदार्थ दिले. जखमेची पाहणी केली आणि प्रथमोपचार करत मानसिक आधार दिला. त्यानंतर नीसरड्या वाटांवर एकमेकांना आधार देत बचाव पथकाने युवकाला सुरक्षित खाली आणले. परिसरात अंधार पसरू लागला असतानाच ही मोहीम यशस्वी ठरली.

त्या युवकाला खोपोली पोलीस स्टेशनमध्ये आणण्यात आले. त्यानंतर पोलीस निरीक्षक सचिन हिरे यांनी त्याची समजूत काढली. त्यांनी युवकाच्या नातेवाईकांशी संपर्क साधून संपूर्ण घटनेची माहिती दिली. आवश्यक त्या प्रशासकीय आणि कायदेशीर पूर्तता पूर्ण करून युवकाला त्याच्या नातेवाईकांच्या ताब्यात देण्यात आले.

या धाडसी मोहिमेत हेल्प फाउंडेशनचे सौरभ घरत यांच्या मार्गदर्शनाखाली महेश भोसले, अमोल कदम, निलेश कुदळे, गौरव शिंदे, भक्ती साठेलकर, रघुवीर खरे, संकेत पाटील, साहिल घरत आणि अथर्व रासम यांनी सहभाग घेतला.