उद्या पेझारीत शेकाप भवनाचे होणार उद्घाटन

शेकाप सरचिटणीस जयंत पाटील यांच्या उपस्थितीत सोहळा
खारेपाट विभागासाठी अद्ययावत कार्यालय

| रायगड | जिल्हा प्रतिनिधी |

अलिबाग तालुक्यातील पेझारी नाका येथे शेतकरी कामगार पक्षाचे खारेपाट विभागासाठी अद्ययावत असे शेकाप भवन उभारण्यात आले आहे. या भवनाचा उद्घाटन समारंभ रविवारी (दि. 19) सायंकाळी चार वाजता पार पडणार आहे. शेकापचे सरचिटणीस जयंत पाटील आणि माजी आमदार बाळाराम पाटील यांच्या प्रमुख उपस्थितीत हा सोहळा उत्साहात साजरा होणार आहे.

या कार्यक्रमाला जिल्हा परिषद माजी अध्यक्षा सुप्रिया पाटील, शेकाप प्रवक्त्या चित्रलेखा पाटील, शेकाप महिला आघाडी प्रमुख मानसी म्हात्रे, शेकाप जिल्हा चिटणीस सुरेश खैरे, जिल्हा सहचिटणीस गौतम पाटील, रायगड बाजारचे चेअरमन नृपाल पाटील, शेकाप जिल्हा चिटणीस मंडळ सदस्य अनिल पाटील, तालुका चिटणीस सुरेश घरत, तालुका सहचिटणीस नरेश म्हात्रे, शेकाप तालुका शेतकरी सभा अध्यक्ष अनिल पाटील, तालुका महिला आघाडी प्रमुख नागेश्वरी हेमाडे आदी मान्यवरांसह पक्षाचे पदाधिकारी, चिटणीस मंडळाचे सदस्य, विविध आघाड्यांचे कार्यकर्ते, महिला, तरुण-तरुणी मोठ्या संख्येने उपस्थित राहणार आहेत.

शेतकरी व कामगारांच्या हक्कांसाठी आयुष्यभर झटलेले जिल्हा परिषदेचे माजी अध्यक्ष स्व. प्रभाकर पाटील तसेच माजी राज्यमंत्री स्व. मीनाक्षी पाटील यांच्या आशीर्वादाने हे शेतकरी कामगार पक्षाचे अलिबाग तालुका कार्यालय उभारण्यात आले आहे. खारेपाट विभागासाठी उभारण्यात आलेले हे आधुनिक व सुसज्ज भवन पक्षाच्या संघटनात्मक कार्याला अधिक बळ देणार असल्याची भावना व्यक्त होत आहे.

दरम्यान, या अद्ययावत कार्यालयाच्या उद्घाटनाची सर्व तयारी पूर्ण झाली असून, पेझारी परिसरातील कार्यकर्त्यांसह जनतेमध्ये उत्साहाचे वातावरण निर्माण झाले आहे.