तोतया ‘क्राईम ब्रँच’ अधिकारी गजाआड

। पनवेल । प्रतिनिधी ।

खाकी वर्दीचा रुबाब दाखवून पनवेलमधील एका व्यक्तीची फसवणूक करणाऱ्या हायप्रोफाईल तोतया पोलीस अधिकाऱ्याला पनवेल शहर पोलिसांनी अटक केली आहे. प्रणव उर्फ संतोष बाळुंजे (44) असे या तोतया पोलीस अधिकाऱ्याचे नाव आहे. त्याने स्वतःला नवी मुंबई क्राईम ब्रँचचा मोठा अधिकारी असल्याचे भासवून तक्रारदाराकडून आणि त्यांच्या ओळखीच्या लोकांकडून तब्बल 4 लाख 75 हजार रुपये उकळून फसवणूक केल्याचे उघडकीस आले आहे. पोलिसांनी या तोतया पोलिसाच्या दोन साथीदारांचाही शोध सुरू केला आहे.

या प्रकरणातील तक्रारदार सत्यवान वसंत घरत (52) पनवेलमधील करंजाडे भागात राहण्यास असून त्यांचा रिअल इस्टेटचा व्यवसाय आहे. घरत यांचे आपल्या व्यवसायातील अनेक लोकांकडे 15 ते 16 लाख रुपये अडकले होते. हीच अडचण ओळखून घरत यांचा मित्र संदीप घनगावे याने त्यांना पैसे काढून देणारे क्राईम ब्रँचचे मोठे अधिकारी त्याच्या ओळखीतील असल्याचे सांगितले होते. त्यानंतर काही महिन्यांपूर्वी आरोपी संतोष वाळुंजे पूर्ण पोलीस गणवेशात, खांद्यावर तीन स्टार (पोलीस निरीक्षक दर्जाचा अधिकारी) लावून, बनावट पोलीस ओळखपत्र धारण करुन महादेव कोंडीलकर आणि नथुराम पवार याच्यासोबत घरत यांच्या घरी गेला होता. त्यावेळी कोंडीलकर आणि पवार यांनी संतोष वाळुंजे क्राईम अँच नवी मुंबईचे मोठे अधिकारी असल्याचे सांगून अडचणीमध्ये असलेल्या लोकांना पैसे काढून देण्याचे काम करत असल्याचे सांगितले. तसेच त्या मोबदल्यात रोख स्वरुपात कमिशन घेत असल्याचे सांगितले. घरत यांचे अडकलेले पैसे वसूल करुन देण्याच्या मोबदल्यात दोन लाख रुपयांच्या कमिशनची मागणी केली. घरत यांचे ज्या लोकांकडे पैसे अडकले होते, त्यांचे नाव, नंबर तसेच कमिशनचे दोन लाख रुपये त्यांनी तिघा भामट्यांना दिले.

पैसे घेतल्यानंतर सुध्दा कोणतेही काम न करता आरोपी संतोष वाळुंजे आणि त्याच्या साथीदारांनी घरत यांच्या ओळखीतील सतीश साबळे आणि विपुल केसवाल यांना पोलीस असल्याचे धमकावून त्यांच्यावर कायदेशीर कारवाई करण्याची भिती दाखवली आणि घरत यांच्या नावाने त्यांच्याकडून 2 लाख 75 हजार रुपये उकळले. हा प्रकार घरत यांना समजल्यानंतर त्यांनी पैसे मागण्यास सुरुवात केली असता, आरोपींनी सातत्याने उडवाउडवीची उत्तरे आणि पोलिसांच्या नावाने दमदाटी देण्यास सुरुवात केली. अखेर घरत यांनी पनवेल शहर पोलीस ठाण्यात धाव घेऊन तक्रार दाखल केली.

त्यानुसार पनवेल शहर पोलिसांनी तिघा तोतयांविरोधात गुन्हा दाखल केला आहे. तसेच पोलिसांनी मुख्य आरोपी संतोष बाळुंजे याला तळोजा येथून बेड्या ठोकल्या आहेत. तर वाळुंजे याचे दोघे साथीदार आरोपी महादेव कोंडीलकर आणि नथुराम पवार या दोघांचा पोलीस शोध घेत आहेत.