वरिष्ठांच्या जाचाला कंटाळल्याचा चालकाचा आरोप
| अलिबाग | प्रतिनिधी |
एसटी महामंडळाच्या मुरुड एसटी बस आगारातील चालकाने शुक्रवारी सकाळी उंदीर मारण्याचे औषध खाऊन आत्महत्या करण्याचा प्रयत्न केला. ही घटना प्रजासत्ताक दिनाच्या दिवशी घडली. चालकाला अधिक उपचारासाठी अलिबाग येथील जिल्हा रुग्णालयात दाखल केले असून त्याची प्रकृती स्थिर आहे. मात्र, आगारातील वरिष्ठांच्या जाचाला कंटाळून त्याने आत्महत्या केल्याचा आरोप केला जात आहे.
नीलेश लांडगे (46) हा मुळ राहणार बुलढाणा जिल्ह्यातील असुन सध्या मुरुड येथे राहत आहेत. हा कर्मचारी मुरुड एसटी बस आगारात गेल्या नऊ वर्षापासून चालक म्हणून कार्यरत आहे. लांडगे बस आगारात शुक्रवारी सकाळी दहा वाजण्याच्या सुमारास आला. मात्र, अचानक त्याची प्रकृती बिघडली. तेथील सहाय्यक वाहतूक निरीक्षक गौतम भोसले व सुरक्षा रक्षक तसेच अन्य कर्मचाऱ्यांच्या मदतीने त्याला स्थानिक सरकारी रुग्णालयात दाखल केले. त्याची प्रकृती बिघडल्याने त्याला अधिक उपचारासाठी अलिबागमधील जिल्हा रुग्णालयात आणण्यात आले. रुग्णालयात त्याच्यावर उपचार सुरु असून सध्या त्याची प्रकृती स्थिर असल्याचे डॉक्टरांनी सांगितले.
बस आगारातील सहाय्यक वाहतूक निरीक्षक भोसले यांच्या जाचामुळे उंदीर मारण्याचे औषध खाल्ले असल्याचा आरोप लांडगे यांनी केला आहे. ऐन वेळेवर ड्युटी बदलणे, मर्जीतील कर्मचाऱ्यांना सुट्टी देणे, रजेचा अर्ज वरिष्ठांकडे न पाठविणे असे प्रकार होत असल्याने त्याने विषारी औषध घेतल्याचे सांगितले.
रायगड जिल्ह्यातील चालक व वाहकांच्या या समस्या सध्या मोठ्या चर्चेत येऊ लागल्या आहेत. चालक व वाहकांचे रजेचे अर्ज वरिष्ठ कार्यालयात वेळेवर पोहचत नसल्याच्या दिवसेंदिवस तक्रारी वाढत आहेत. काही वरिष्ठ अधिकारी मर्जीतील चालक व वाहकांना सौम्य ड्युटी देणे, महिला वाहकांनादेखील रात्री अकरा ते बारा वाजेपर्यंत ड्युटी देणे, ड्युटी लावण्यासाठी चालक वाहकांकडून दारु अथवा, पैसे घेणे असा प्रकारही काही आगारातून घडत असल्याची जोरदार चर्चा आहे. रात्रीचा दिवस करून प्रवाशांना सेवा देणाऱ्या चालक व वाहकांच्या समस्यांकडे विभाग वाहतूक नियंत्रक दिपक घोडे या प्रकरणाकडे गांभीर्याने लक्ष देतील का, असा सवाल उपस्थित केला जात आहे.
चालक लांडगे यांनी केलेला आरोप खोटा आहे. बदनाम करण्यासाठी त्यांनी माझ्यावर आरोप केला आहे. लांडगे यांची शुक्रवारी सकाळी ड्युटी होती. परंतु, ते डेपोमध्ये सकाळी साडेदहा वाजता आले. त्याचवेळी अचानक त्यांना चक्कर आली. स्वतः मी व सहकाऱ्यांनी त्याला रुग्णालयात उपचारासाठी दाखल केले. माझ्यावर केलेले आरोप खोटे आहेत. कोरोना काळातील हा विषय असून त्याबाबत माझा काहीही संबंध नाही.
गौतम भोसले, सहाय्यक वाहतूक निरीक्षक,
मुरुड एसटी बस आगार