कंटेनर चालकाचा मृत्यू
| पनवेल | वार्ताहर |
पनवेलजवळील मुंबई-पुणे महामार्गावर मुंबई लेनवर कि.मी. 5.600 येथे शिवकर गावच्या हद्दीत पनवेल शहर पोलीस ठाणे हद्दीत टेम्पो आणि कंटेनरचा मध्यरात्रीच्या सुमारास अपघात झाला. यात कंटेनर चालकाचा मृत्यू झाला आहे. या अपघाताची नोंद पनवेल शहर पोलीस ठाण्यात करण्यात आली आहे.
यातील आयशर टेम्पो क्रमांक एमएच 47 वाय 4646 यावरील चालक बबलू नंदलाल यादव (45, रा. चारकोप हिंदुस्तान नाका, कांदिवली-मुंबई) हे त्यांच्या ताब्यातील आयशर टेम्पो मुंबई-पुणे दुर्तगती महामार्गावर कि.मी. 5.600 येथे शोल्डर लेनला थांबवून लघुशंकेला गेले. त्यांच्या पाठीमागून येणार्या कंटेनर क्रमांक एमएच 43 बीएक्स 7976 यावरील चालक प्रियदर्शनी नायर (60) याचे गाडीवरचे नियंत्रण सुटून पुढे शोल्डर लेनला उभा असलेल्या आयशर टेम्पोला पाठीमागून धडक देऊन अपघात झाला आहे. अपघातात कंटेनर ड्रायव्हरसमोरची काच फुटून ड्रायव्हर काचेतून उडून कंटेनरच्या समोर रोडवर पडल्याने त्याच्या डोक्याला गंभीर दुखापत झाली. सदर जखमी इसमास आयआरबी अॅम्ब्युलन्समधील डॉक्टरांनी तपासून मयत घोषित केले. मयत इसमाला खासगी अॅम्ब्युलन्सने पनवेल ग्रामीण रुग्णालयात पुढील कार्यवाहीसाठी नेण्यात आले आहे. अपघात ठिकाणी वाहतूक पोलीस स्टाफसह व आयआरबी कडील स्टाफ, देवदूत टीम, तसेच पनवेल शहर पोलीस ठाण्याचे पोलीस हजर होते. अपघातातील दोन्ही वाहने शोल्डर लेनला उभी करुन, त्यांना बॅरिकेटिंग करण्यात आले. त्यानंतर महामार्गावरील वाहतूक सुरळीत चालू करण्यात आली.