माणगावातील अनधिकृत अतिक्रमणे जमीनदोस्त

नगरपंचायतीच्या अतिक्रमण हटाव मोहिमेचा धडाका

। माणगाव । प्रतिनिधी ।

मुंबई-गोवा महामार्ग अनेक वर्ष रखडला आहे. रखडलेल्या रस्त्यामुळे अनेक अपघात तसेच, वाहतूकोंडी नेहमीच होत असते. त्यातच माणगाव शहरात मुंबई-गोवा महामार्गालगत छोट्या मोठ्या व्यापार्‍यांनी आपल्या टपर्‍या व दुकाने थाटली होती. माणगाव नगर पंचायत मुख्याधिकारी संतोष माळी यांनी माणगाव शहरात अतिक्रमण हटाव मोहिम हाती घेतली असून शुक्रवारी (दि.7) मुंबई-गोवा महामार्गालगत असलेली अतिक्रमणे जमीनदोस्त करण्यात आली आहेत.

माणगाव शहर हे भौगोलिक दृष्ट्या रायगड जिल्ह्याचे मध्यवर्ती ठिकाण आहे. आणि हेच शहर सध्या वाहतूककोंडीचे माहेरघर म्हणून ओळखले जाऊ लागले आहे. शनिवार, रविवार आणि सोमवार यादिवशी तर माणगांव शहरातुन चालणेदेखील पादचारी आणि वाहनचाकांना डोकेदुखी ठरत आहे. माणगाव शहरात अनधिकृत व बेकायदेशीर बांधकामे करून महामार्ग व रस्ता काबीज केला होता. त्यामुळे सातत्याने वाहतूक कोंडी होत होती. नागरिकांना महामार्गावरून चालताना जीव मुठीत घेऊन चालावे लागत होते. याविरुद्ध माणगांव मुंबई-गोवा महामार्गालगत असणार्‍या व्यापार्‍यांनी केलेली अतिक्रमणे मूलभूत कारणीभूत असल्याचे अधोरेखित करत माणगांव नगरपंचायतने या अतिक्रमणांना आधी नोटिसा बजावल्या होत्या. त्यानंतर कारवाईचे सत्र सुरू केले गेले. आणि माणगाव शहरातील सर्वच शासकीय जागेवरील अतिक्रमण जमीनदोस्त करण्याचा बडगा नगरपंचायतीने उचलला आहे.

महामार्गाने घेतला सुटकेचा श्‍वास
महामार्गावरील शासकीय जागेवरील अतिक्रमणे पोलीस बंदोबस्तात जेसीबीच्या सहाय्याने हटविण्यात आली. कारवाई सुरू असताना महामार्गावर मोठ्या प्रमाणत वाहतूक कोंडी झाली होती. तसेच, बघ्यांचीदेखील तोबा गर्दी झाली होती. यावेळी माणगाव पोलीस व वाहतूक पोलीसांच्या सहाय्याने वाहतूक कोंडी सोडविण्यात आली. तसेच, कारवाई सुरू असताना तेथील दुकानदारांनी संताप व्यक्त केला. तर, काही दुकानदारांनी स्टे ऑर्डर असल्याचे यावेळी सांगितले. परंतु, मुध्याधिकारी संतोष माळी यांनी सर्वांना आवाहन केले की, तुमच्याकडे कायदेशीर कागदपत्रे असल्यास ते दाखवा. अन्यथा शासकीय जागेवरील अतिक्रमणे हटविण्यात येईलच, असे त्यांनी सांगितले. त्यामुळे अतिक्रमण तोडल्याने महामार्गाने मोकळा श्‍वास घेतला असून माणगावकरांना आता वाहतूक कोंडीतून सुटका मिळेल, अशी आशा असल्याने त्यांनी सुटेकचा श्‍वास घेतला आहे.

माणगाव शहरात मुंबई-गोवा महामार्गावर वाहतूक कोंडी हा जटिल प्रश्‍न बनला होता. माणगाव शहरातील शासकीय जागेवरील अतिक्रमण हटविण्यात येत असून काळवा रोड, बामणोली रोड कॉर्नर, मुंबई-गोवा महामार्गावरील फॉरेस्ट कॉर्नर आणि जुने एसटी स्टँड येथे असलेले अतिक्रमण हटविण्यात येत आहे. तसेच, शहरातील सर्वच शासकीय जागेवरील अतिक्रमण हटविण्यात येणार आहेत.

– संतोष माळी, मुख्याधिकारी,
नगर पंचायत माणगाव