जास्तीच्या व्याजाचे आमिष दाखवून लाखो लुटले

गुन्हेगारास उत्तर प्रदेश येथून अटक

। पनवेल । प्रतिनिधी ।

जास्त व्याज दराने उच्च परताव्याबाबत खोटे आमिष दाखवून 37,75,527/- रूपये लुबाडणाऱ्या एका गुन्हेगारास पनवेल शहर पोलिसांच्या पथकाने नोएडा उत्तर प्रदेश येथून अटक केली आहे.

पनवेल शहरातील 73 वर्षीय ज्येष्ठ नागरिकाला आरोपी रविशंकर सुरेशप्रसाद मिश्रा उर्फ बी.एल. पटेल (वय 30 वर्षे, रा. रिवा, मध्यप्रदेश) याने आपण ईपीएफओ ऑफीस, नवी दिल्ली येथून बोलत असल्याचे खोटे सांगून फिर्यादी यांना पेमेंट ऑफ डिव्हिडंड अँड डिपॉजिट कॉन्फीर्मशन या शासनाच्या स्किममध्ये पैसे गुंतवणूक करून त्यामधून 7 ते 8 महिन्यांत जास्त व्याज दराने उच्च परताव्याबाबत खोटे आमिष दाखवले. त्यानंतर त्यांच्या ॲक्सीस बँक व स्टेट बँक ऑफ इंडिया, या दोन वेगवेगळ्या बँकेच्या खात्यामधून फोनपेद्वारे वेळोवेळी एकूण रूपये 37,75,527/- स्वीकारून त्यांची फसवणूक केली होती. याबाबतची तक्रार पनवेल शहर पोलीस ठाण्यात दाखल होताच वरिष्ठ पोलीस निरीक्षक, नितीन ठाकरे यांच्या मार्गदर्शनाखाली सायबर पथकाचे पोलीस उपनिरीक्षक अभय कदम, पोहवा निरज थवई, पोशि विद्याधर गायकवाड, पोशि अभय मेऱ्या, पोना प्रवीण पाटील, मपोशि शितल कोकणी आदींच्या पथकाने तांत्रिक तपासाच्या आधारे सखोल माहिती घेतली असता सदर आरोपी हा नोयडा, मध्य प्रदेश येथे लपून बसल्याचे आढळून आले. सदर पथकाने त्याठिकाणी जाऊन सापळा रचून आरोपीला जेरबंद केले आहे.