लोणावळ्याजवळ भीषण अपघात; दोघांचा मृत्यू

| पुणे | प्रतिनिधी |

गेल्या काही दिवसांमध्ये भीषण अपघातांमुळे पुण्याचे नाव सध्या चर्चेत आहे. अशातच पुन्हा एकदा पुण्यातील लोणावळा येथे शनिवारी (दि.6) सकाळी भीषण अपघाताची घटना घडली आहे. यावेळी टेम्पो आणि कारचा धडकी भरवणारा अपघात झाला आहे. या अपघातात दोघांचा मृत्यू झाला असून हा अपघात लोणावळ्यातील लायन्स पॉइंटजवळ झाल्याची प्राथमिक माहिती समोर आली आहे. यावेळी टेम्पो आणि कार समोरासमोर धडकल्याने कारचा अक्षरश: चुराडा झाला आहे. तर, टेम्पोच्या उजव्या बाजूचे प्रचंड नुकसान झाले आहे. पोलिसांनी दिलेल्या माहितीनुसार, मुळ गोव्याचे असलेल्या मयुर वेंगुर्लेकर (24) आणि योगेश सुतार (21) या दोघांचा या अपघातात मृत्यू झाला आहे. हे दोघेही गोव्याहून लोणावळ्यात फिरण्यासाठी आले होते. अपघातानंतर दोघांचेही मृतदेह स्थानिक रुग्णालयात हलवण्यात आले आहेत. याप्रकरणी लोणावळा पोलिसांनी गुन्हा दाखल करून घेतला आहे.