संतापजनक! जन्मदात्रीनेच केला लेकीचा खून

। पनवेल । प्रतिनिधी |

कळंबोली उपनगरात माणुसकीला काळीमा फासणारी धक्कादायक घटना घडली आहे. जन्मदात्या आईनेच सहा वर्षांच्या चिमुरडीचा गुदमरून खून केल्याचा प्रकार कळंबोलीतील सेक्टर 1 मधील गुरूसंकल्प हाऊसिंग सोसायटीत समोर आला. मुलगी नको होती, ती व्यवस्थित बोलत नव्हती आणि हिंदी भाषेत बोलत असल्याने त्रास होत होता, अशा अत्यंत क्षुल्लक कारणांवरून या निर्दयी आईने आपल्या लेकीचा जीव घेतल्याचे पोलीस तपासात स्पष्ट झाले आहे.

विशेष म्हणजे या निष्ठूर व निर्दयी महिलेने बीएसस्सीपर्यंत शिक्षण घेतले आहे. कळंबोली पोलिसांनी या प्रकरणी संबंधित महिलेला अटक केली आहे. कळंबोलीतील गुरूसंकल्प सोसायटीत आयटी अभियंता असलेले पती आणि बीएस्सी शिक्षण घेतलेली 30 वर्षीय पत्नी वास्तव्यास होते. 2017 साली या दाम्पत्याचा विवाह झाल्यावर 2019 मध्ये त्यांना कन्या झाली. सहा वर्षांची असणाऱ्या या मुलीला लहानपणापासूनच बोलण्यात अडथळा येत होता. ती मराठीऐवजी हिंदी भाषेचे शब्द उच्चारून हिंदी भाषेत अधिक बोलत असे. यामुळे तीची आई सतत नाराज होती.

मुलीच्या या अडचणींमुळे आई मानसिक तणावात होती आणि तिने अनेकदा पतीकडे “अशी मुलगी नको” असे सांगितल्याचे तपासात समोर आले आहे. पतीने मात्र तिला समज देण्याचा प्रयत्न केला होता. अखेर 23 डिसेंबरच्या रात्री या आईने मुलगी संपविण्याचा निश्चय केला. त्याच दिवशी आजी नातीला भेटण्यासाठी भेटवस्तू घेऊन घरी आली होती; मात्र तिची आणि बालिकेची भेट होऊ शकली नाही.

काही वेळाने पती घरी परतल्यानंतर झोपलेली मुलगी उठत नसल्याचे लक्षात येताच सर्वांनी तातडीने रुग्णालयात धाव घेतली. तेथे सुरुवातीला हृदयविकाराच्या झटक्याने मृत्यू झाल्याचा बनाव करण्यात आला. मात्र, कळंबोली पोलीस ठाण्याचे वरिष्ठ पोलीस निरीक्षक राजेंद्र कोते यांना या मृत्यूबाबत संशय वाटल्याने त्यांनी शवविच्छेदनाची विशेष विनंती केली. प्राथमिक अहवालात श्वसनमार्ग अडथळ्याचे संकेत मिळताच आई-वडिलांची कसून चौकशी करण्यात आली. सुमारे सहा तासांच्या चौकशीनंतर अखेर आईनेच मुलीचा गुदमरून खून केल्याची कबुली दिली. पोलिसांनी या निर्दयी कृत्याबद्दल संबंधित आईला अटक करून पुढील तपास सुरू केला आहे.