भोस्ते घाटात केमिकल टँकर पलटी

। खेड । प्रतिनिधी ।

तालुक्यातील भोस्ते घाट येथे रविवारी (दि. 29) रात्रीच्या सुमारास मुंबई- गोवा राष्ट्रीय महामार्गावर केमिकल टँकर उलटून मोठा अपघात घडला. लक्ष्मी ऑरगॅनिक कंपनीमधून इथाइल ऍसिटेट हे ज्वलनशील रसायन घेऊन जाणारा टँकर अचानक पलटी झाला.

या अपघातानंतर टँकरमधून रसायनाची गळती सुरू झाल्याने परिसरातील नागरिकांना तीव्र वास जाणवू लागला. काहींनी श्वसनास त्रास होत असल्याच्या तक्रारीही केल्या. यामुळे परिसरात काही काळ भीतीचे वातावरण निर्माण झाले. घटनेची माहिती मिळताच पोलिसांचे पथक, अग्निशमन दलाच्या गाड्या तसेच संबंधित कंपनीची सुरक्षा पथक तातडीने घटनास्थळी दाखल झाली. लिकेज नियंत्रणात आणण्यासाठी आणि परिस्थिती सुरक्षित करण्यासाठी युद्धपातळीवर प्रयत्न सुरू असून, परिस्थिती नियंत्रणात आणण्याचे काम सुरू आहे. दरम्यान, संबंधित कंपनीवर पीएफएएस उत्पादन संदर्भातील वाद सुरू असतानाच हा अपघात घडल्याने परिसरात खळबळ उडाली आहे. प्राथमिक माहितीनुसार, हा टँकर मुंबईकडे निर्यातीसाठी जात असताना अपघात झाला. प्रशासनाकडून नागरिकांना सतर्क राहण्याचे तसेच घटनास्थळापासून सुरक्षित अंतर राखण्याचे आवाहन करण्यात आले आहे. अपघात असूनही मुंबई-गोवा राष्ट्रीय महामार्गावरील मुंबईहून गोव्याकडे जाणारी वाहतूक सुरू ठेवण्यात आली असल्याची माहिती प्रशासनाने दिली.