अन्वीने जागतिक स्तरावर रचला इतिहास

| पारगाव | प्रतिनिधी |

अवसरी बुद्रुक, ता. आंबेगाव येथील अन्वी दीपक हिंगे या अवघ्या आठ वर्षांच्या बुद्धिबळपटूने जागतिक स्तरावर इतिहास रचत नऊ वर्षांखालील मुलींच्या गटात जागतिक क्रमवारीत प्रथम क्रमांकाचे स्थान पटकावले आहे.अन्वी ही जगातील सर्वात लहान वयाची महिला कँडिडेट मास्टर (डब्ल्यूसीएम) ठरली असून नऊ वर्षांखालील वयोगटातील जगातील एकमेव डब्ल्यूसीएम बनली आहे. चिंचवड येथील एलप्रो इंटरनॅशनल स्कूलची विद्यार्थिनी असलेल्या अन्वीने जिल्हा, राज्य, राष्ट्रीय आणि आंतरराष्ट्रीय स्तरावर सातत्याने उल्लेखनीय कामगिरी केली आहे. ती महाराष्ट्राच्या सात वर्षांखालील मुलींची राज्य विजेती ठरली असून सध्या महाराष्ट्र नऊ वर्षांखालील मुलींच्या राज्य स्पर्धेत उपविजेती आहे. राष्ट्रीय स्तरावर तिने राष्ट्रीय बुद्धिबळ स्पर्धेत कांस्यपदक पटकावले आहे.

आंतरराष्ट्रीय स्तरावर ती आठ वर्षांखाली गटातील उपविश्वविजेती आहे. तसेच राष्ट्रकुल स्पर्धेत रौप्यपदक आणि पश्चिम आशिया युवा बुद्धिबळ स्पर्धेत दोन सुवर्ण व चार रौप्यपदके जिंकून तिने भारताचे नाव उंचावले आहे. स्थानिक ते जागतिक स्तरापर्यंत प्रत्येक टप्प्यावर यश मिळवणारी अन्वी आज अनेकांसाठी प्रेरणास्थान ठरली आहे. तिच्या उल्लेखनीय कामगिरीची दखल घेत प्रतिष्ठित फेमिना मासिकाच्या फेब्रुवारी-मार्च 2026 अंकाच्या मुखपृष्ठावर भारतातील 2025 मधील सर्वोत्तम 10 वर्षांखालील यशस्वी मुलांपैकी एकफ म्हणून तिची निवड करण्यात आली. एवढ्या लहान वयात राष्ट्रीय स्तरावरील अशा प्रतिष्ठित सन्मानाने अन्वी हिंगे हिच्या यशात आणखी एक मानाचा तुरा रोवला आहे. पश्चिम आशिया युवा बुद्धिबळ स्पर्धेत उपविजेती ठरत अन्वीने महिला कँडिडेट मास्टर किताबासाठी आवश्यक नॉर्म आधीच पूर्ण केला होता. स्पेन दौऱ्यातील कामगिरीने तिच्या या ऐतिहासिक यशावर शिक्कामोर्तब केले. स्पेनमधील प्रतिष्ठित एक्स ओपन, ॲलिकांते स्पर्धेत तिने महिला विजेती किताब पटकावत करंडक आणि 200 युरो रोख पारितोषिक जिंकले. एप्रिल 2026च्या पहिल्या आठवड्यात स्पेनमधील दोन स्पर्धांमध्ये अन्वी हिंगे हिने एकूण 192 इलो गुणांची वाढ करत आपले अधिकृत फिडे मानांकन 1824 पर्यंत नेले आणि जागतिक क्रमवारीत नंबर एक स्थान मिळवले.