धोंडसे येथे दरड कोसळली

| पाली /बेणसे | प्रतिनिधी |

मुसळधार पावसामुळे सुधागड तालुक्यातील धोंडसे गाव ते स्मशानभूमी रस्त्यावर मोठी दरड कोसळल्याची घटना घडली. या अपघातात कोणतीही जीवितहानी झाली नसल्याची माहिती पाली पोलीस ठाण्याचे पोलीस निरीक्षक हेमलता शेरेकर यांनी दिली. जोरदार पावसाने धोंडसे गावाजवळील टेकडीवरून माती आणि दगडांचा मोठा ढिगारा थेट रस्त्यावर येऊन पडला. दरड कोसळल्याने रस्त्यावर असलेला विजेचा खांबही कोसळला. विजेचा खांब कोसळल्यामुळे गावातील पाणीपुरवठा यंत्रणा बंद पडली असून, पिण्याच्या पाण्याची मोठी गैरसोय निर्माण झाली आहे. या दरड कोसळलेल्या घटनेची माहिती मिळताच ग्रामस्थांनी घटनास्थळी धाव घेतली. सध्या धोंडसे गावचे सरपंच आणि पोलीस पाटील परिस्थितीवर लक्ष ठेवून आहेत. रस्ता मोकळा करण्यासाठी आणि पाणीपुरवठा पूर्ववत करण्यासाठी प्रशासनाकडून युद्धपातळीवर प्रयत्न सुरू आहेत.