लुधियाना बॉम्बस्फोट प्रकरण: मास्टरमाईंड जसविंदर सिंह अटकेत

। पंजाब । वृत्तसंस्था ।
पंजाबमधील लुधियाना न्यायालय बॉम्बस्फोट प्रकरणातील मास्टरमाईंड जसविंदर सिंह मुल्तानी याला जर्मनीत अटक करण्यात आली आहे. जसविंदर दिल्ली आणि मुंबईमध्येही दहशतवादी हल्ले घडवून आणण्यासाठी कट रचत होता.

जसविंदर सिंह हा बंदी घालण्यात आलेल्या शिख्स फॉर जस्टिसशी संबंधित होता. जसविंदर हा संघटनेचा संस्थापक गुरपतवंत सिंह पन्नू याच्या अगदी जवळचा मानला जातो. पन्नू हादेखील भारतातील मोस्ट वॉन्टेड दहशतवादी आहे. मोदी सरकारच्या विनंतीवरून जसविंदर सिंगला जर्मन पोलिसांनी एरफर्ट परिसरातून अटक केल्याचे म्हटले जात आहे. जसविंदर सिंग हा खलिस्तान समर्थक असून त्याचे पाकिस्तानशी जवळचे संबंध आहेत. जसविंदर पंजाबमध्ये शस्त्रास्त्रांच्या तस्करीतही सहभागी असल्याचे समोर आले होते. तो मूळचा पंजाबमधील होशियारपूरचा रहिवासी असून अनेक दिवसांपासून देशातील फुटीरतावादी कारवायांत सहभागी आहे.

पंजाबच्या लुधियाना जिल्हा न्यायालयात झालेल्या बॉम्बस्फोट प्रकरणाच्या प्राथमिक चौकशीतून धक्कादायक माहिती समोर आली होती. एनएसजी बॉम्ब स्क्वॉड आणि फॉरेन्सिक तज्ज्ञांना इथे वापरण्यात आलेल्या बॉम्बमध्ये उच्च स्फोटके असल्याचे आढळून आले होते. अपघातात मृत्यू झालेल्या व्यक्तीचा या घटनेत हात असल्याचीही शंका व्यक्त करण्यात आली होती. टॉयलेटमध्ये अचानक बॉम्बचा स्फोट घडल्याने कट रचणार्‍याचाच या दुर्घटनेत मृत्यू झाल्याची शक्यता तपास यंत्रणांनी व्यक्त केली होती. मृताच्या शरीरातून अ‍ॅल्युमिनिअम आणि प्लॅस्टिकची धारदार खिळे सापडले होते.

गुरुवारी झालेल्या या स्फोटात माजी हेड कॉन्स्टेबल गगनदीप सिंग यांचा मृत्यू झाला तर इतर सहा जण या स्फोटात जखमी झाले. बॉम्बस्फोटामुळे शौचालयाच्या पाण्याचा पाईप फुटला. त्यात अनेक अवशेष वाहून गेल्याने बॉम्ब बनवण्यासाठी कोणत्या वस्तूचा वापर झाला होता, याची पुष्टी होऊ शकली नाही. मात्र यामध्ये आरडीएक्सचाही वापर केला गेल्याची शक्यता तपास यंत्रणांनी व्यक्त केली आहे. फॉरेन्सिक तपासणीतून अधिक माहिती समोर येण्याची शक्यता आहे.