नगराध्यक्षांकडून मुलींना वाढदिवसाची भेट

106 मुलींची सुकन्या समृद्धी योजनेची उघडली खाती

कर्जत | वार्ताहर |
कर्जत नगरपरिषदेच्या नगराध्यक्ष सुवर्णा जोशी यांनी आपल्या जन्मदिवसाचे औचित्य साधून कर्जत नगरपरिषद क्षेत्रातील 106 मुलींची पोस्टात सुकन्या समृद्धी योजनेची खाती उघडून पहिला हप्ता भरून त्यांना जन्मदिवसाची आगळीवेगळी भेट दिली आहे.
प्रत्येक जण आपला जन्मदिवस वेगवेगळ्या पद्धती साजरा करत असतो. मात्र, कर्जत नगरपरिषदेच्या नगराध्यक्षा सुवर्णा जोशी यांनी आपल्या वाढदिवसानिमित्त कर्जत नगरपरिषद क्षेत्रातील शून्य ते दहा वर्षांच्या आतील मुलींचे पोस्ट कार्यालयात सुकन्या समृद्धी योजनेचे खाते उघडून त्यांचा प्रत्येकी 250 रुपयांचा पहिला हप्ता भरून त्यांना जन्मदिवसाची अनोखी भेट दिली आहे.
नगराध्यक्ष सुवर्णा जोशी यांनी या मुलींच्या पुस्तक वितरणाचा समारंभ कर्जत नगरपरिषदेच्या प्रांगणात आयोजित केला होता. यावेळी व्यासपीठावर नगराध्यक्ष सुवर्णा जोशी, मुख्याधिकारी डॉ. पंकज पाटील, नगरसेविका स्वामिनी मांजरे, संचिता पाटील, प्राची डेरवणकर, विशाखा जिनगरे, वैशाली मोरे, डाग विभागाचे पनवेल उपविभाग सहाय्यक अधीक्षक उमेश जनवाडे, केतन जोशी, माजी नगरसेवक दीपक मोरे, संदीप भोईर, सुनील ठाकूर, अरविंद नातू, भूषण बडेकर, पंढरीनाथ खडे, श्रद्धा मोहरे, गणेश पार्टे, अंकुश डांगरे, सागर देशमुख, नितीन जाधव, आनंद कडव यांच्यासह डाकघर, नगरपरिषद कर्मचारी उपस्थित होते. कार्यक्रमाचे सूत्रसंचालन अंकुश इंगळे यांनी, तर आभार प्रदर्शन अशोक खोपडे यांनी केले.

मुलींच्या भविष्याचा विचार करून डाक विभागाने ही योजना काढली आहे. या योजनेचा पहिला हप्ता मी भरला आहे, मात्र पुढील हप्ते आपण न चुकतात भरा, त्यामुळे आपल्याला सेव्हिंगची सवय लागेल.
सुवर्णा जोशी, नगराध्यक्ष