पाली डम्पिंग ग्राऊंड समस्यांच्या गर्तेत

कचरा रस्त्यावर, नागरिकांचे आरोग्य धोक्यात

। पाली/बेणसे । वार्ताहर ।

पाली शहरातील कित्येक टन कचरा टेंबी वसाहतीजवळील डम्पिंग ग्राऊंडमध्ये टाकला जातो. संरक्षक भिंत नसल्याने हा कचरा मुख्य रस्त्यावर येऊन नागरिकांचे आरोग्य धोक्यात आले आहे. शिवाय इतरही अनेक समस्यांनी डम्पिंग ग्राऊंडला घेरले आहे.

डम्पिंग ग्राऊंडच्या आजूबाजूला शिक्षक व इतर वसाहती आहेत. आयटीआय व विद्युत महावितरण सबस्टेशन आहे. शिवाय गृहसंकुल इमारती सुद्धा आहेत. मढाळी व शिळोशी गावांना जाण्याचा हा मुख्य रस्ता आहे. त्यामुळे रस्त्यालगत असलेल्या डंपिंग ग्राऊंडवरील कचरा पूर्णपणे रस्त्यावर आल्याने व डंपिंग ग्राऊंडला संरक्षण भिंत नसल्याने घाण व दुर्गंधीमुळे येथील नागरिकांचे आरोग्य धोक्यात आले आहे. शिवाय तेथून जाणार्‍या नागरिकांना नाकदाबून येजा करावी लागत आहे. फेब्रुवारी महिन्यात पाली ग्रामपंचायतीची नगरपंचायत झाली, मात्र अजूनही घनकचरा व्यवस्थापनचा प्रश्‍न अद्याप काही सुटला नाही.

डंम्पिंग ग्राऊंडवर असलेल्या कचर्‍यामध्ये अधिक प्रमाणात प्लॅस्टिकयुक्त कचरा असतो. डंपिंग ग्राऊंडला संरक्षण भिंत नसल्याने मोकाट गुरे, कुत्रे तेथे येऊन प्लास्टिक मधील अन्नपदार्थ कचर्‍यासह खातात त्यामुळे त्यांचे आरोग्य धोक्यात येत असून अनेक जनावरे देखील दगावली आहेत. याबरोबरच येथील कचर्‍याची विल्हेवाट लावण्यासाठी कोणतीच शास्त्रीय पद्धत नाही. हा कचरा थेट जाळला जातो. त्यामुळे मोठया प्रमाणात वायु प्रदूषण होऊन पर्यावरण व नागरिकांचे आरोग्य धोक्यात आले आहे.

प्लास्टिकचा पुनर्वापर
प्लास्टिक बंदीचा कायदा करूनही प्लास्टिकचा भस्मासुर दिवसागणिक वाढत चालला आहे. त्यामुळे या प्लास्टिकचा पुनर्वापर व प्रक्रिया व्हावी, यासाठी सुधागड तालुक्यातील सिद्धेश्‍वर ग्रामपंचायतने पुढाकार घेतला आहे. यासाठी 5 आर मुंबई ही संस्था, रायगड जिल्हा परिषद, सुकन्या संघ, शाळा, स्वदेस समिती व प्राईड इंडिया यांच्या सहाय्याने जिल्ह्यातील पहिला पथदर्शी प्रकल्प राबवत आहे. त्यामुळे या ग्रामपंचायतीचा आदर्श प्रत्येक ग्रामपंचायत व पाली नगरपंचायतीने घेऊन शहरातील प्लास्टिक एकत्रितपणे जमवून त्या प्लास्टिकचे पुनर्वापर (रिसायकल) करणे गरजेचे आहे. यामुळे पर्यावरणाचे संरक्षण आणि घनकचरा व्यवस्थापन उत्तम प्रकारे करता येईल, असे तज्ज्ञांचे म्हणणे आहे.

नगरपंचायत कर्मचारी कचरा डंम्पिंग ग्राऊंडमध्ये न टाकता रस्त्याच्या बाजूला टाकतात. हा कचरा रस्त्यावर आल्याने दुर्गंधी व घाणीमुळे नागरिकांचे आरोग्य धोक्यात आले आहे. पाली नगरपंचायतीने या डंपिंग ग्राऊंडला संरक्षण भिंत घालावी जेणेकरून जनावरे आत जाणार नाहीत आणि कचरासुद्धा बाहेर येणार नाही.

संजय घोसाळकर
सामाजिक कार्यकर्ते, पाली

डम्पिंग ग्राऊंड व त्या बाहेर येणार्‍या कचर्‍यासंदर्भात लवकरच योग्य उपयोजना करण्यात येईल. याबाबत कर्मचार्‍यांना सूचना देण्यात आल्या आहेत. नागरिकांना कोणत्याही प्रकारे त्रास होणार नाही, याची खबरदारी आम्ही घेत आहोत.

आरिफ मणियार
उपनगराध्यक्ष, पाली