रायगडात नववर्षाचा जल्लोष

समुद्रकिनारे, मंदिरांमध्ये तुफान गर्दी

| अलिबाग | विशेष प्रतिनिधी |

पर्यटनात जगाच्या पटलावर नावारूपाला आलेल्या रागयडचा समुद्र किनारा पर्यटकांसाठी खास आकर्षण ठरले आहेत. त्यामुळे नाताळ आणि नववर्ष स्वागतासाठी पर्यटकांनी किनार्‍यांना पसंती दिली होती. मागील पाच दिवस मोठ्या संख्येने पर्यटक इथं दाखल झाले आहेत. तर दोन दिवसांत सुमारे अलिबाग, मुरुड-जंजीरा, कोर्लई येथील किल्याला सुमारे 25 हजार पर्यटकांनी भेट दिली. यामधून पर्यटन व्यवसायाला चालना मिळाली. तर अष्टविनायक दर्शनापैकी पालिचा बल्लालेश्‍वर व महडच्या वरद विनायकाचे दर्शन घेऊन भक्तांनी नव वर्षाची सुरुवात केली.

किनार्‍यांना पर्यटकांची भरती
नववर्षाच्या स्वागतावेळी अलिबाग समुद्र किनाऱ्याला गर्दीचे अक्षरशः उधाण आले होते. यावेळी तरुणाईने ठेका धरत बेधूंद नृत्याचा अनुभव लुटला. फटाक्यांच्या आतषबाजीत, जल्लोषात रायगड जिल्ह्यात 2023 सालचे स्वागत करण्यात आले. यंदा लागोपाठ सुट्टीचे दिवस आल्याने किनाऱ्यावरील गावांमध्ये पर्यटक हजारोंच्या संख्येने आले होते. अलिबाग, मुरुड, श्रीवर्धन, बोर्ली पंचतन, काशीद, आवास, नागाव, रेवदंडा आदी ठिकाणी हॉटेल आणि वाड्यांमध्येही थर्टीफर्स्टच्या पार्ट्यांचे आयोजन करण्यात आले होते. रात्री 12 वाजता फटाक्यांची आतषबाजी करून 2023 वर्षाचे स्वागत करण्यात आले.

अलिबागसह रायगडातील सर्वच किनाऱ्यांवर पर्यटकांनी मोठी गर्दी करीत नववर्षाचे आनंदमय वातावरणात स्वागत केले. या काळात कुठेही अनुचित घटना घडू नये यासाठी पोलीस यंत्रणेसह नगरपालिका यंत्रणाही सतर्क झाली होती. पोलिसांच्यावतीने महामार्गावर सर्वत्र चोख पोलीस बंदोबस्त तैनात करण्यात आला आहे. तरीही परतण्यावेळी उत्साही पर्यटकांच्या बेशिस्तपणाने अनेक ठिकाणी वाहतूक कोंडी होत आहे. तर दुसरीकडे वाहतुकीचे नियम भंग करणार्‍या 402 नागरीकांवर कायदेशीर कारवाई करीत त्यांना 2 लाख 51 हजार 300 रुपयांचा दंड आकारला आहे.