उरणचा पाणीपुरवठा सुरळीत करा; शेकापची मागणी

प्रशासनाला निवेदन

| उरण | प्रतिनिधी |

उरणमधील पाणीपुरवठा खंडित न करता पूर्ववत सुरळीत सुरु ठेवला जावा, अशी मागणी उरण शेकापतर्फे करण्यात आली आहे. तसे निवेदन नगरपालिका, एमआयडीसीला देण्यात आले असल्याचे शहर चिटणीस शेखर पाटील यांनी सांगितले.

उरण शहरातील पाणीपुरवठा रविवारी, मंगळवारी व शुक्रवारी बंद राहील अशा प्रकारचे पत्र एमआयडीसी ने नगरपालिकेला दिले आहे. त्यावरुन नागरिकांमध्ये कमालीची नाराजी पसरली आहे. या संदर्भात शेतकरी कामगार पक्षाचे शहरचिटणीस शेखर पाटील यांनी शहरातील पाणीपुरवठा सुरळीत होण्यासाठी नगरपालिकेला निवेदन दिले आहे.

उरण शहरामध्ये अगोदरच अपुरा पाणीपुरवठा आहे. त्यामध्ये जर तीन दिवस पाणीपुरवठा बंद राहिला तर मोठी पाणीटंचाई भासेल यासंदर्भात उपाययोजना करावी.

शेखर पाटील
शहर चिटणीस

एमआयडीसीची थकीत पाणीपट्टी पालिकेने भरावी, शहरात धुळीवडा कोट नाका येथे पिण्याच्या पाईपलाईनमधून घाणेरडे पाणी येते यामुळे नागरिकांच्या आरोग्याला धोका असल्याचेही पाटील यानी निदर्शनास आणले. त्याचप्रमाणे शहरांमध्ये गेल्या महिनाभरात कीटकनाशकांची फवारणी होत नसल्याने नागरिकांच्या आरोग्य धोक्यात आले आहे. तरी किटकनाशके फवारणी नियमित करावी अशी मागणी करण्यात आली.

त्याचबरोबर भावरा येथील रस्त्यात अडथळा आणणारा इलेक्ट्रिक पोल हटवावा, अशी मागणी करण्यात आली. यासंदर्भातील निवेदन वरिष्ठ लिपिक संजय डापसे यांना देण्यात आले. या समस्या बाबत मुख्याधिकारी राहुल इंगळे यांना दूरध्वनीवरून संपर्क साधला असता त्यांनी या समस्या सोडवण्यासाठी सकारात्मक असल्याचे सांगितले. यावेळी समस्या बाबत संबंधित विभागाला सूचना करण्याचे सांगितले यावेळी विभाग चिटणीस दिलीप पाटील, शंकर भोईर, संजय पाटील, चंद्रकांत पाटील, शांताराम म्हात्रे उपस्थित होते.