राजिपच्या चार कार्यालयावर जागा शोधण्याची आली वेळ
| माणगाव | प्रतिनिधी |
गेल्या अनेक वर्षापासून मुंबई-गोवा महामार्गालगत माणगाव बाजारपेठेत असणार्या पूर्वीच्या पंचायत समिती कार्यालयात रायगड जिल्हा परिषदची महत्त्वाची व जिव्हाळ्याची असणार्या पाच कार्यालयांवर स्थलांतरित होण्याची वेळ आली आहे. या कार्यालयांची जागा नव्याने मंजूर झालेल्या ट्रॉमा केअर सेंटरला देण्याचे शासनाने निश्चित केल्यामुळे या कार्यालयांवर जागा शोधण्याची वेळ आली आहे. कार्यालये स्थलांतरित करण्यासाठी रायगड जिल्हाधिकारी तसेच राजिपचे मुख्य कार्यकारी अधिकारी यांनी लेखी पत्र दिले आहे. त्यामुळे या कार्यालयांवर स्थलांतराची कुर्हाड बसणार आहे.
माणगाव येथे राजिपच्या पंचायत समिती ही गेली अनेक वर्षे चालू होती. माणगाव पंचायत समितीची स्वतंत्र इमारत गेली 16 वर्षांपूर्वी माणगाव प्रशासकीय भवनलगत शासनाने बांधली. त्याठिकाणी जि.प.च्या विविध विभागांचे काम सुरू आहे. मात्र, राजिपच्या तालुका आरोग्य अधिकारी कार्यालय, उपअभियंता, ग्रामीण पाणीपुरवठा विभाग, एकात्मिक बालविकास सेवा योजना विभाग आणि गटशिक्षण अधिकारी यांच्याकडील गट साधन केंद्र सर्व अभियान कार्यालय, महिला बचत गट हिरकणी कार्यालय या पाच कार्यालयांच्या विभागांना नवीन पंचायत समिती इमारतीत जागा नसल्याने ही पाच महत्त्वाची कार्यालये अद्यापपर्यत जुन्या पंचायत समिती इमारतीत सुरु होती. या इमारतीलगत माणगाव उपजिल्हा रुग्णालय असल्याने या ठिकाणी शासनाने ट्रॉमा केअर सेंटर एक वर्षापूर्वी मंजूर केले होते. याठिकाणी ट्रॉमा केअर सेंटर उभारले जाणार आहे. त्यामुळे या पाच कार्यालयांना पर्यायी व्यवस्था करण्याचे सांगितले आहे.
ट्रॉमा केअर सेंटरमुळे या पाच कार्यालये स्थलांतरित करण्यासाठी संबंधित विभागांना शासनाकडून पत्र आल्याने त्यांच्यापुढे दुसरी जागा शोधण्याची वेळ आली आहे. या कार्यालयांना माणगाव तहसीलदार व माणगाव पंचायत समितीचे गटविकास अधिकारी यांनी प्रयत्न करून बसण्याची व्यवस्था करावी, असेही जिल्हाधिकारी यांनी लेखी पत्रान्वये कळविले आहे. मात्र, हे पाच कार्यालये स्थलांतरित होणार असल्याने नागरिकांनाहि कार्यालये शोधताना तारेवरची कसरत करावी लागणार आहे.