आए.ए.एस. प्रतीक जुईकर यांना शेकापकडून लाखाचा धनादेश

आ. जयंत पाटील यांची वचनपूर्ती

| अलिबाग | विशेष प्रतिनिधी |

रायगड जिल्ह्यातील पहिले आयएएस अधिकारी होण्याचा बहुमान पटकावणार्‍या प्रतिक जुईकर यांचे वडील चंद्रशेखर जुईकर यांना शेतकरी कामगार पक्षाच्या वतीने शेकाप महिला आघाडीप्रमुख चित्रलेखा नृपाल पाटील यांच्या हस्ते एक लाखाचा धनादेश सुपूर्द करण्यात आला. प्रतिक जुईकर यांचा या यशाबद्दल सत्कार करताना शेकापचे सरचिटणीस आमदार जयंत पाटील यांनी त्यांना एक लाख रुपये देणार असल्याचे जाहीर केले होते. त्याचीच वचनपूर्ती म्हणून सदर धनादेश शनिवारी शेतकरी भवन येथे सुपूर्द करण्यात आला.

प्रतिक जुईकर यांनी केंद्रीय लोकसेवा आयोगाची (यूपीएससी) परीक्षा उत्तीर्ण होत, मुलाखतीचा अडथळाही पार केला आहे. ते देशात 177 व्या क्रमांकाने उत्तीर्ण झाले होते. याचबरोबर ते रायगड जिल्ह्यातील पहिले थेट आयएएस होण्याचा मानही प्रतिक जुईकर यांनी मिळवला होता.

त्यांच्या या यशाबद्दल आ. जयंत पाटील यांनी प्रतिक जुईकर यांचा सत्कार केला. त्यावेळी त्यांनी प्रतिक यांच्या कामगिरीबद्दल तसेच त्यांच्या पुढील शिक्षणात मदतीसाठी एक लाख रुपये देणार असल्याचे जाहीर केले होते. त्यानुसार शनिवारी चित्रलेखा पाटील यांच्या हस्ते एक लाखाचा धनादेश सुपूर्द करण्यात आला.

प्रतिक चंद्रशेखर जुईकर हे मूळचे अलिबाग तालुक्यातील शहाबाज चौकीचा पाडा येथील राहणारे आहेत. कर्जत येथील जिल्हा परिषद शाळेतील शिक्षक चंद्रशेखर जुईकर यांचे ते सुपूत्र आहेत.

स्पर्धा परीक्षेची तयारी करणार्‍या जिल्ह्यातील अन्य विद्यार्थ्यांसमोर प्रतिक जुईकर यांनी एक आदर्श ठेवला आहे. आपल्याप्रमाणे त्यांनी जिल्ह्यात भविष्यात अनेक विद्यार्थी आयएएस होण्याकरिता प्रयत्न करावेत.

चित्रलेखा पाटील,
शेकाप महिला आघाडीप्रमुख