श्रीवर्धनमध्ये भीषण अपघात; तरुणाचा मृत्यू

| श्रीवर्धन | प्रतिनिधी |

श्रीवर्धन शहरातील समुद्रकिनाऱ्याकडे जाणाऱ्या रस्त्यावर पुणे येथून आलेल्या एका पर्यटकाच्या थार गाडीने दुचाकीस्वाराला जोरदार ठोकर दिली. हा अपघात इतका भीषण होता की, दुचाकीस्वाराचा जागीच मृत्यू झाला.

याबाबत सविस्तर वृत्त असे की, पुणे येथून आलेल्या काळ्या रंगाच्या एका थार गाडीने श्रीवर्धन येथील व्यावसायिक परवेज हमदुले हे आपल्या स्कुटीवरून घरी जात असताना मद्यधुंद अवस्थेत असलेल्या पर्यटकांनी चुकीच्या बाजूनी गाडी चालवून त्यांना जोरदार ठोकर दिली व गाडी जवळ जवळ 40 फूट फरफटत पुढे नेली. अपघात एवढा भयानक होता की, परवेज हमदुले यांचा डोक्याला जबर मार लागल्याने जागीच मृत्यू झाला. श्रीवर्धन पोलिसांनी तातडीने या घटनेची दखल घेत गाडीमधील सर्व युवकांना श्रीवर्धन पोलीस ठाण्यात नेले व सदर अपघाताच्या जागी मोठ्या प्रमाणात पोलीस बंदोबस्तदेखील लावण्यात आला. त्यानंतर परवेज हमदुले यांना शासकीय रुग्णालयात आणण्यात आले. त्या ठिकाणीदेखील जमावाने खूप मोठ्या प्रमाणात गर्दी केली होती. जमलेल्या गर्दी कडून श्रीवर्धन शहरातील वाणी परिसरातील मार्ग रोखून धरण्याचा प्रयत्न केला गेला. परंतु, पोलीस प्रशासनाने योग्य भूमिका घेत जमावाचा हा प्रयत्न हाणून पाडला. या अपघाताच्या पार्श्वभूमीवर श्रीवर्धन शहरामध्ये अतिरिक्त पोलीस फाटा तैनात करण्यात आला आहे.