नेरळ- माथेरान घाटात रस्त्यावर कोसळला भलामोठा दगड

। नेरळ । प्रतिनिधी ।

थंड हवेचे ठिकाण असलेल्या माथेरान या पर्यटनस्थळावर पावसाळ्यात सर्वाधिक पर्यटक पर्यटनासाठी येत आहेत. सध्या माथेरान येथे जाण्यासाठी एकमेव रस्ता असून, नेरळ माथेरान घाटातून सर्व वाहने माथेरान कडे जात असतात. दरम्यान सध्या सुरू असलेल्या पावसामुळे या घाट रस्त्यावर भला मोठा दगड रस्त्यावर कोसळल्याने वाहनचालक जीव धोक्यात घालून वाहने चालवत आहेत.

नेरळ- माथेरान घाटरस्ता हा माथेरान या पर्यटनस्थळी जाण्यासाठी एकमेव रस्ता आहे. या रस्त्याने माथेरान येथे येण्यासाठी पर्यटक आपली वाहने घेऊन येत असतात. पावसाळ्यात माथेरान मधील वातावरण आल्हाददायक आणि धुकेमय असते आणि त्यामुळे दररोज हजारो पर्यटक माथेरान मध्ये पर्यटनासाठी येत असतात. शनिवार- रविवारी तर पर्यटकांची गर्दी यामुळे नेरळ- माथेरान घाटरस्ता पर्यटकांच्या वाहनांनी फुललेला दिसून येतो. माथेरान येथे गेल्या काही वर्षात प्रचंड संख्येने पर्यटक पावसाळी वर्षासहलीसाठी येत असतात. या पर्यटकांना नेरळ- माथेरान घाटरस्त्यातील वाहनांची वाहतूक कोंडी आणि त्यानंतर माथेरान घाट रस्त्यात कोसळणाऱ्या दरडी यांची देखील मोठी भीती असते. पर्यटक बहुसंख्येने आपली वाहने घेऊन येत असल्याने घाटरस्त्यात वाहनांची कोंडी पहायला मिळते. यावर्षी गेल्या काही दिवसांपासून सतत पाऊस सुरू आहे. त्यामुळे नेरळ- माथेरान घाटात दररोज लहान- लहान दरडी कोसळण्याचे प्रमाण वाढले आहे. दररोज पडणारा पाऊस यामुळे डोंगरातील माती ठिसूळ होते आणि त्यामुळे दरडी कोसळत असतात. हे लक्षात घेता वाहनचालक यांनी सावधानता बाळगावी अशी सूचना सतत केली जात आहे. त्यामुळे पर्यटकांची सुरक्षा लक्षात घेऊन नवीन वाहनचालक यांनी घाटरस्त्यातून वाहने चालवू नयेत असे सल्ले दिले जात आहेत.

माथेरान वरून खाली येत असताना पर्यटकांच्या वाहनांचा अर्धा रस्ता वॉटर पाईप स्टेशन परिसरात एका मोठ्या दगडाने अडवला आहे. हा भलामोठा दगड खाली आला आणि त्यावेळी एखादे वाहन रस्त्याने प्रवास करीत असेल तर मोठी दुर्घटना घडू शकते. मात्र, त्याबाबत सार्वजनिक बांधकाम विभागाने दगड हलवण्यासाठी कोणत्याही प्रकारची कार्यवाही केलेली नाही. त्याचवेळी हा भलामोठा दगड एका लहानशा दगडाला जाऊन अडकला आहे. त्यामुळे देखील मोठी भीती व्यक्त केली जात असून, बांधकाम खात्याकडून कोणत्याही प्रकारची कार्यवाही होत नसल्याने वाहनचालक नाराजी व्यक्त करीत आहेत. नेरळ- माथेरान टॅक्सी संघटनेचे वाहनचालक यांना अशा अवघड स्थितीतून गाडी चालवण्याची सवय असल्याने धोका पत्करून आपली सेवा देत आहेत. मात्र, प्रशासनाच्या हलगर्जीपणामुळे मोठ्या प्रमाणावर नुकसान पोहचू शकेल अशी स्थिती त्या दगडाने निर्माण केली आहे.