एलईडी बोटींवर करंजा बंदरात कारवाई

| उरण | प्रतिनिधी |

बंदी असतानाही करंजा बंदर परिसरात एलईडी पद्धतीने मासेमारी करणार्‍या दोन बोटीवर मत्स्यव्यवसाय विभागाच्या परवाना अधिकार्‍यांनी शुक्रवारी छापा टाकत कारवाई केली. यावेळी दोन बोटीवरील थ्री फेज जनरेटर 4000, 3000 वॅट एलईडी बल्ब जप्त करण्यात आले आहे.

केंद्र आणि राज्य सरकारची एलईडी पद्धतीने मासेमारी करण्यास बंदी असतानाही अनेक मासेमारी बोटी या एलईडी तंत्राचा वापर करून खोल समुद्रात मत्स्यव्यवसाय आयुक्तालयाच्या अधिकारी वर्गाच्या आशिर्वादाने मासेमारी करतात.या एलईडी पद्धतीने मासेमारी करताना मोठया माशा बरोबरच लहान जीवही पकडले जातात. लहान मासे मृत झाल्याने त्यांची पैदास होणे थांबते आणि याचमुळे अनेक माशांच्या जाती नष्ट झाल्या आहेत. यामुळे शासनाने एलईडी मासेमारीला बंदी घातली आहे.

मात्र, बंदी घातली असताना करंजा बंदर परिसरात मत्स्यव्यवसाय विभागाच्या कुपा आशिर्वादाने मोठ्या प्रमाणात मासेमारी सुरू आहे. सध्या पाकिस्तान व भारत देश यांच्यात युद्ध जन्य परिस्थिती निर्माण झाल्याने पोलीस, कस्टम यंत्रणेने सुरक्षिततेच्या दृष्टीकोनातून समुद्रात गस्त वाढविल्याने संबंधित विभागाच्या अधिकार्‍यांनी मासेमारी करणार्‍या बोटीवर छापा टाकला. यामध्ये पेण दादर येथील अनिल जोशी यांची विठ्ठल माऊली आयएनडी एमएच-7 एमएम 1941 या नौकेची तपासणी केली असता एक जनरेटर 3 फेज व पाण्यातील एलईडी बल्ब 2000 चे दोन व पाण्यातील 4000 चे दोन बल्ब हे साहित्य आढळून आले.

तर उरण करंजा कोढरीपाडा येथील माऊली तुळजाई एकविरा आयएनडी एमएच 7 एमएम 3184 यांच्या नौकेची तपासणी करून एक जनरेटर 3 फेज, पाण्यातील एलईडी लाईट-चार जप्त करण्यात आले आहे. सदर जप्त करण्यात आलेल्या बोटी करंजा बंदरात ठेवण्यात आल्या आहेत.

गस्तीवर असताना दोन बोटीवर कारवाई केली आहे. एक बोट पेण दादर आणि दुसरी उरण करंजा येथील आहे. त्या बोटी करंजा बंदरात ठेवण्यात आल्या. जप्त केलेले सामान अलिबाग येथे नेण्यात आले. त्याचा प्रस्ताव तयार करून मच्छ उपायुक्तांकडे पाठवला आहे.

– सुरेश बागुलगावे, परवाना अधिकारी,
उरण मत्स्यव्यवसाय विभाग