दारूने घेतला निरपराध मुलीचा बळी

| कल्याण | प्रतिनिधी |

दारूसाठी पैसे दिले नाही म्हणून शेजाऱ्यांशी वाद घातला, इतकेच नव्हे तर संतापलेल्या बाप लेकाने साथीदारांसह दारूचे पैसे न देणाऱ्या इसमासह त्याची पत्नी आणि 19 वर्षीय मुलीला लाकडी दांडक्याने मारहाण केली. या हल्ल्यात एका 19 वर्षीय मुलीचा मृत्यू झाला आहे. सानिया सय्यद असे मयत मुलीचे नाव असून, कल्याण पश्चिमेकडील इंदिरानगर परिसरात ही घटना घडली आहे. याप्रकरणी महात्मा फुले पोलिसांनी गुलाम शेख उर्फ मुन्ना शेख, त्याचा मुलगा अब्दुल शेख आणि त्यांचे सहकारी शोएब शेख, अजिज शेख, शाहिद शेख या पाच जणांना अटक केली आहे.

मिळालेल्या माहितीनुसार, कल्याण पश्चिमेकडील इंदिरानगर परिसरात निसार सय्यद हे आपल्या पत्नी व मुलीसह राहतात. निसार सय्यद हे भाजी विक्रीचा व्यवसाय करत आपल्या कुटुंबाचा उदरनिर्वाह करत होते. सोमवारी (दि.05) रात्री दहा वाजण्याच्या सुमारास घरी जेवत असताना याच परिसरात राहणारा गुलाम शेख हा त्यांच्या घरी आला त्याने त्यांच्याकडे दारूसाठी पैसे मागितले असता निसार यांनी पैसे देण्यास नकार दिल्याने या दोघांमध्ये वाद झाला. याच वादातून गुलाम यांचा मुलगा अब्दुल शेख त्याचा मित्र शोएब शेख, अजित शेख आणि शाहीर शेख यांनी निसार यांच्या घरात घुसून निसार यांना बेदम मारहाण केली. यावेळी निसार यांची पत्नी झुलेखा व मुलगी सानिया या दोघी निसार यांना सोडवण्याकरता आल्या असता या दोघींना देखील त्यांनी धक्काबुक्की केली. या दरम्यान अब्दुल याने त्यांच्या मुलीवर लाकडी दांडक्याने हल्ला केला, या हल्ल्यात सानिया हिचा मृत्यू झाला आहे. याप्रकरणी महात्मा फुले पोलीस ठाण्यात गुन्हा दाखल करण्यात आला असून, पोलिसांनी गुलाम शेख उर्फ मुन्ना शेख त्याचा मुलगा अब्दुल शेख आणि त्याचे सहकारी शोएब शेख, अजिज शेख, शाहिद शेख या पाच जणांना अटक केली आहे.