अलिबागची कोंडी फुटणार, प्रशासन ॲक्शन मोडवर!

शाळा, जेएसडब्ल्यूच्या बसगाड्यांमुळे होणाऱ्या कोंडीवर उपाययोजना

| अलिबाग | प्रतिनिधी |

अलिबाग शहरातील वाढती वाहतूक कोंडी आणि पार्किंगच्या समस्येवर अखेर प्रशासनाने गांभीर्याने पावले उचलण्यास सुरुवात केली आहे. शाळा भरण्या-सुटण्याच्या वेळेत होणारी वाहतूक कोंडी, जेएसडब्ल्यूच्या मोठ्या विद्युत बसगाड्यांमुळे निर्माण होणारा वाहतुकीचा अडथळा तसेच शहरातील बेशिस्त पार्किंगवर उपाययोजना करण्यासाठी नगरपरिषद, जिल्हा वाहतूक शाखा आणि उपप्रादेशिक परिवहन विभागाची संयुक्त बैठक झाली. या बैठकीत शाळांच्या आवारातच वाहनतळाची व्यवस्था करण्याबरोबरच जेएसडब्ल्यूच्या बसगाड्यांसाठी शहराबाहेर स्वतंत्र थांबा निश्चित करण्याचा निर्णय घेण्यात आला.

अलिबाग नगरपरिषदेच्या सभागृहात 7 ऑगस्ट रोजी झालेल्या या बैठकीस उपनगराध्यक्षा मानसी संतोष म्हात्रे, वीज व सार्वजनिक बांधकाम समितीचे सभापती प्रशांत मधुसूदन नाईक, मुख्याधिकारी सागर संभाजी साळुंखे, उपप्रादेशिक परिवहन विभाग पेणचे अधिकारी स्वप्नील भोंग व अक्षय एस. खाडे, जिल्हा वाहतूक शाखेच्या एपीआय मीरा बी. लाड, प्रदीप झेमसे यांच्यासह शहरातील विविध शाळांचे प्रतिनिधी आणि जेएसडब्ल्यूचे प्रतिनिधी उपस्थित होते.

अलिबाग शहरातील सेंट मेरी स्कूल, चेंढरे, अरुणकुमार वैद्य हायस्कूल आणि कन्याशाळा परिसरात शाळा भरण्याच्या व सुटण्याच्या वेळेत मोठ्या प्रमाणावर वाहतूक कोंडी होत असल्याचे बैठकीत निदर्शनास आणण्यात आले. विशेषतः सेंट मेरी स्कूलमध्ये वाहनतळाची पुरेशी व्यवस्था नसल्याने विद्यार्थ्यांना सोडण्यासाठी व घेण्यासाठी येणारी वाहने रस्त्यावर उभी राहत असल्याने वाहतुकीला अडथळा निर्माण होत असल्याचे वाहतूक शाखेने स्पष्ट केले.

नियमांनुसार शाळांनी विद्यार्थ्यांना सोडण्यासाठी व घेण्यासाठी येणाऱ्या वाहनांची व्यवस्था शक्यतो शाळेच्या आवारातच करणे आवश्यक असल्याचे बैठकीत सांगण्यात आले. याबाबत उपनगराध्यक्षा मानसी म्हात्रे आणि सभापती प्रशांत नाईक यांनी सेंट मेरी स्कूल प्रशासनाने तातडीने वाहनतळाची व्यवस्था करण्याच्या सूचना दिल्या. तसेच वाहतूक शाखेने प्रत्यक्ष जागेची पाहणी करून आवश्यक ठिकाणी आखणी करून देण्याचे ठरले.

जेएसडब्ल्यू कंपनीच्या मोठ्या विद्युत बसगाड्या शहरात ये-जा करताना रस्त्यांवर वाहतूक कोंडी होत असल्याचा मुद्दाही बैठकीत चर्चेला आला. या बसगाड्यांसाठी शहराबाहेर स्वतंत्र थांबा अथवा वाहनतळ निश्चित करण्याची सूचना सभापती प्रशांत नाईक यांनी केली. शहरालगत वाहनतळासाठी जागा भाड्याने किंवा खरेदी करून जेएसडब्ल्यू कर्मचाऱ्यांना एकाच ठिकाणाहून बसने ने-आण करण्याची व्यवस्था केल्यास शहरातील वाहतूक कोंडी मोठ्या प्रमाणात कमी होऊ शकते, असे उपनगराध्यक्षा मानसी म्हात्रे यांनी सांगितले. याबाबत कंपनीच्या व्यवस्थापनाशी चर्चा करून आवश्यक कार्यवाही करण्याचे आश्वासन जेएसडब्ल्यूच्या प्रतिनिधींनी दिले.

वाहतूक आराखडा मंजुरीच्या प्रतीक्षेत
अलिबाग शहराचा वाहतूक आराखडा तयार करून मंजुरीसाठी जिल्हाधिकारी कार्यालयाकडे सादर करण्यात आला आहे. मात्र या आराखड्याला अद्याप मंजुरी मिळालेली नसल्याने त्यानुसार वाहतूक नियमांची प्रभावी अंमलबजावणी करता येत नसल्याचे सभापती प्रशांत नाईक यांनी स्पष्ट केले. याप्रकरणी नगरपरिषद प्रशासन, जिल्हा वाहतूक शाखा आणि उपप्रादेशिक परिवहन विभागाच्या अधिकाऱ्यांची जिल्हाधिकाऱ्यांसोबत संयुक्त बैठक घेऊन वाहतूक आराखड्याच्या मंजुरीसाठी पुढील कार्यवाही करण्याची सूचना उपनगराध्यक्षा मानसी म्हात्रे यांनी केली.

तोपर्यंत ‌‘नो पार्किंग'ची कडक अंमलबजावणी
वाहतूक आराखडा मंजूर होईपर्यंत शहरातील आवश्यक ठिकाणी ‌‘नो पार्किंग'चे फलक लावण्याची सूचना जिल्हा वाहतूक शाखेच्या एपीआय मीरा लाड यांनी केली. या सूचनेनुसार नगरपरिषदेकडून आवश्यक ठिकाणी फलक लावण्यास हरकत नसल्याचे सभापती प्रशांत नाईक यांनी सांगितले. दरम्यान, शाळा परिसरातील कोंडी, जेएसडब्ल्यूच्या बसगाड्यांची वाहतूक आणि बेशिस्त पार्किंग यावर प्रशासनाने ठोस उपाययोजना केल्यास अलिबाग शहरातील वाहतुकीचा प्रश्न मोठ्या प्रमाणात सुटण्याची शक्यता आहे.