मुरूडमधील रस्त्याच्या डांबरिकरणाला सुरूवात

| आगरदांडा | प्रतिनिधी |

मुरूड परेश नाका ते एकदरा पुलापर्यंतच्या रस्त्याच्या 2023-24 दरम्यान मंजुरी मिळाली होती. या रस्त्याचा ठेका ऑनलाइन पद्धतीने संबंधित ठेकेदार कंपनीला मिळाला होता. पंरतु, अडीच वर्षे होत आली तरी संबंधित ठेकेदाराला रस्तावर डांबर टाकण्यासाठी वेळ मिळत नसल्याने हा रस्ता वेळेत बनु शकला नाही. त्यामुळे दिवसेंदिवस रस्त्याला मोठंमोठे खड्डे पडले होते. पादचारी व वाहनचालकांना या रस्त्यावरून वाहन चालवताना कसरत करावी लागत होती. तसेच छोटे मोठे अपघात होत होते. पर्यटकांची संख्या देखील रोडावली होती. त्यामुळे व्यवसायिकांना वाहनचालकांना आर्थिक फटका सहन करावा लागत होता. हा रस्ता लवकरात लवकर व्हावा याकरिता सामाजिक कार्यकर्ते तथा पद्मदुर्ग व्यावसायिक कल्याणकारी मंडळाचे अध्यक्ष अरविंद गायकर यांनी अनेक निवेदन व उपोषण केले. त्याबरोबर मुरूड- जंजिरा नगरपरिषदेचे नगरसेवक रुपेश पाटील, नगरसेवक ॲड. रुपेश पाटील यांनीही या स्त्याकरिता निवेदन दिले होते. अखेर त्यांच्या लढ्याला यश आले असून एकदरा पुल, मासळी बाजार, तवसाळकर लॉज व समुद्रकिनारा पासुन रस्त्याच्या डांबरीकरणाला सुरूवात झाली आहे. त्यामुळे हा रस्ता पुर्णतः खड्डे मुक्त होणार असुन आता पर्यटकांचा व स्थानिकांचा प्रवास सुसाट होणार आहे.