बारपे ग्रामस्थांचे ठिय्या आंदोलन

| माणगाव | वृत्तसंस्था |

माणगाव एसटी महामंडळाच्या ढिसाळ कारभाराच्या निषेधार्थ तळा तालुक्यातील बारपे गावातील नागरिकांनी एसटी सेवा वेळेवर सुरू न झाल्यास ठिय्या आंदोलन करण्याचे निवेदन माणगाव एसटी आगर प्रमुखांना दिले आहे. वावेदिवाळी, वडाचीवाडी, मोरयाची वाडी, विनवली, साळशेत, बहुलेवाडी, महागाव, बारपे, महुरे, कोरखंडा या गावातील विद्यार्थी आणि नागरिकांना एसटीच्या अनियमित वेळेचा काही दिवसांपासून त्रास सहन करावा लागत आहे. या परिसरात जाण्यासाठी दुपारी 12.30 व आणि 2.30 वा. इंदापूर कोरखंडा एसटी सेवा सुरू आहे परंतु 12.30 वाजता असणारी एसटी सेवा बंद करण्यात आली आहे त्यामुळे शाळेतील विद्यार्थी आणि बाजारासाठी शहरात आलेल्या महिला, विविध कागदपत्र काढण्यासाठी येणाऱ्या नागरिकांना घरी परत जाण्यासाठी तासन तास एसटी स्टँडवर उपाशी पोटी थांबावे लागत आहे.

विद्यार्थांचा पूर्ण वेळ प्रवास आणि एसटीच्या प्रतिक्षेत जात आहे. 12.30 ची एसटी न आल्याने 2.30 च्या एसटीमध्ये मोठ्या प्रमाणावर प्रवास करतात प्रवासी आकडा जवळ जवळ 90 ते 120 पर्यंत जातो एसटीत चेंगरा चेंगरी होते त्यामुळे प्रवाशांना फार मोठा मनस्ताप सहन करावा लागत आहे. या संदर्भात अनेक वेळा तक्रारी, लेखी अर्ज निवेदन देऊनही एसटी महामंडळाकडून कोणताच प्रतिसाद दिला जात नाही त्यामुळे त्रस्त बारपे ग्रामस्थ परिसरातील नागरिक व विविध संघटनांनी ठिय्या आंदोलन करण्याचे निवेदन एसटी माणगाव आगर प्रमुखास देण्यात आले आहे. यावेळी 12.30 वा. सुटणारी एसटी दैनंदिन सुरू करणे, वाहन मार्गस्थ बिघाड होणार नाही याची काळजी घेणे इत्यादी मागण्यांचा समावेश आहे.