| पनवेल | विशेष प्रतिनिधी |
पनवेल महानगरपालिकेच्या ‘स्वराज्य’ इमारतीचे भूमीपूजन आणि इतर विकास कामांचा लोकार्पण सोहळा आद्य क्रांतीवीर वासुदेव बळवंत फडके नाट्यगृहात झाला. या कार्यक्रमास विधानसभेतील विरोधी पक्षनेते देवेंद्र फडणवीस, पालकमंत्री अदिती तटकरे, महापौर डॉ.कविता किशोर चौतमोल, खासदार सुनील तटकरे, खासदार श्रीरंग बारणे, आ. बाळाराम पाटील, निरंजन डावखरे, आमदार रवींद्र चव्हाण, माजी मंत्री राम शिंदे, उपमहापौर सीता पाटील, विरोधी पक्षनेते प्रीतम म्हात्रे, आयुक्त गणेश देशमुख, अतिरिक्त आयुक्त तृप्ती सांडभोर आदी मान्यवर उपस्थित होते.
कार्यक्रमाच्या प्रास्ताविकामध्ये आयुक्त गणेश देशमुख यांनी महापालिका स्थापनेपासूनचा आजपर्यंतचा विकास यांचा आढावा घेतला. या पालिकेत चांगली कामे करण्यासाठी सर्वच पक्षांचा पाठिंबा असल्याचे सांगितले. महापौर डॉ. कविता किशोर चौतमोल यांनी उपस्थितांचे स्वागत केले. यावेळी त्यांनी गेल्या पाच वर्षात महापालिकेने राबविलेल्या विविध प्रकल्पांबाबत माहिती दिली. पालकमंत्री आदिती तटकरे यांनी नवी मुंबईपेक्षा मोठी सर्वोत्कृष्ट प्रशासाकीय इमारत पनवेल महापालिकेची असेल, असा विश्वास व्यक्त केला. खारघरमधील पांडव कड्याचा पर्यटनाच्या दृष्टीने विकास करण्यासाठी प्रयत्न केला जाईल, असे प्रतिपादन केले. याप्रसंगी सर्व नगरसेवक, पालिका अधिकारी, कर्मचारी, पनवेल क्षेत्रातील नागरिक उपस्थित होते.