| पुणे | प्रतिनिधी |
धनकवडी परिसरात पादचारी ज्येष्ठ महिलेच्या गळ्यातील एक लाख 20 हजारांचे मंगळसूत्र दुचाकीस्वार चोरट्यांनी चोरुन नेल्याची घटना घडली आहे. याबाबत एका ज्येष्ठ महिलेने सहकारनगर पोलीस ठाण्यात तक्रार दिली आहे. याप्रकरणी चोरट्यांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदार 65 वर्षीय ज्येष्ठ महिला धनकवडीतील चैतन्यनगर परिसरात राहायला आहेत. मंगळवारी (दि.14) दुपारी एकच्या सुमारास त्या धनकवडीतील त्रिमूर्ती चौकातून निघाल्या होत्या. रस्ता ओलांडत असताना भरधाव वेगाने दुचाकीस्वार आडवा आला. दुचाकीस्वाराबरोबर असलेल्या साथीदाराने महिलेच्या गळ्यातील एक लाख 22 हजार रुपयांचे मंगळसूत्र चोरुन नेले. चोरलेले मंगळसूत्र साडेतीन तोळे असल्याचे महिलेने तक्रारीत म्हटले आहे. सहायक पोलीस निरीक्षक सागर पाटील तपास करत आहेत.