ब्रिलियो नॅशनल स्टेम चॅलेंज 2024

खंडप्पा हायस्कूलची क्लस्टर राउंडमध्ये बाजी

। उरण । प्रतिनिधी ।

पनवेल येथील विठोबा खंडप्पा हायस्कूल आणि ज्युनियर कॉलेज व घाट येथील श्री सदगुरू वामनबाबा माध्यमिक विद्यालयातील विद्यार्थ्यांनी ब्रिलियो नॅशनल स्टेम चॅलेंज 2024 च्या क्लस्टर राउंडमध्ये विजय मिळवला आहे. या स्पर्धेचे आयोजन ब्रिलिओ या डिजिटल ट्रान्सफॉर्मेशन सर्व्हिसेस व सोल्यूशन्स पुरविणार्‍या कंपनीने केले होते. शालेय विद्यार्थ्यांमध्ये स्टेम शिक्षणाचा प्रसार करणार्‍या स्टेम लर्निंग या सामाजिक संस्थेनेही या आयोजनात भाग घेतला होता.

क्लस्टर राउंडचे आयोजन पनवेल येथील राकेश जैन हायस्कूलमध्ये करण्यात आले होते. यामध्ये या विद्यार्थ्यांच्या यशाचा उत्सव साजरा करण्यात आला. हे विजेते आता झोनल राउंडमध्ये पुढे जातील, ज्याचा अंतिम उद्देश बेंगळुरूमध्ये 27 ऑगस्ट रोजी होणार्‍या ग्रँड फिनालेमध्ये स्पर्धा करणे आहे. स्टेम (विज्ञान, तंत्रज्ञान, अभियांत्रिकी, गणित) या विषयांमधील विविध उपक्रम यापुढे वर्भभर घेतले जाणार आहेत. त्यांची सुरुवात या स्पर्धेच्या निमित्ताने झाली आहे. यामध्ये विज्ञान आणि गणित मॉडेल स्पर्धा, तंत्रज्ञान आणि अभियांत्रिकी यांची तोंडओळख यांचा समावेश होता. इयत्ता सहावी ते दहावीपर्यंतच्या विद्यार्थ्यांमध्ये कुतूहल, नावीन्य आणि डिझाइन विचारविषयक कौशल्ये वाढवण्याच्या दृष्टीने ही नॅशनल स्टेम चॅलेंज डिझाइन केलेली आहे.

शिक्षणाचा प्रसार करणारी अग्रणी संस्था

स्टेम लर्निंग ही भारतभर स्टेमचे शिक्षणाचा प्रसार करण्यास समर्पित असलेली एक अग्रणी संस्था आहे. देशभरातील 4 हजाहून अधिक शाळांमध्ये ती काम करते. तसेच, सुमारे 350 हून अधिक कॉर्पोरेट कंपन्यांच्या कॉर्पोरेट सीएसआर उपक्रमांच्या सहभागातून ‘स्टेम लर्निंग’ने सरकारी शाळांमध्ये विज्ञान केंद्रे, विज्ञान प्रयोगशाळा आणि टिंकर लॅब स्थापन केल्या आहेत. अशा प्रकारे 10 लाखांहून अधिक विद्यार्थ्यांपर्यंत पोहोचून, भारतीय शिक्षण प्रणालीमध्ये परिवर्तन घडवून आणण्यासाठी आणि नवोन्मेषकांच्या पुढच्या पिढीला सक्षम बनवण्यासाठी स्टेम लर्निंग योगदान देत आहे.