मदतनीसामार्फत मागितली लाच; नायब तहसीलदारावर गुन्हा दाखल

। ठाणे । प्रतिनिधी ।

सातबारावरील नाव बदली करण्यासाठी मदतनीसामार्फत 25 हजारांची लाच मागणार्‍या नायब तहसीलदार यांच्या विरोधात शहापूर पोलीस ठाण्यात गुन्हा दाखल करण्यात आला आहे. दत्तात्रय बांबळे असे नायब तहसीलदार यांचे नाव असून ते शहापूर येथील तहसीलदार कार्यालयात कार्यरत आहेत.

जीवदानी संस्था विरार यांची वाशाळा आणि वेळूक या ठिकाणी जमीन आहे. या जमिनीच्या सात बारा उतार्‍यावर असलेल्या संचालकांची नावे बदली करण्यासाठी तक्रारदार यांनी मार्च महिन्यात अर्ज दाखल केला होता. या अर्जावर कारवाई करताना नायब तहसीलदार यांनी त्यांच्या मदतनीसामार्फत 25 हजार लाच मागितली होती. त्याबाबत पालघर येथे तक्रारदार यांनी तक्रार केली होती. या तक्रारीबाबत पुन्हा एकदा पंचासमक्ष ठाण्याच्या लाचलुचपत प्रतिबंधक विभागाने पडताळणी केली असता नायब तहसीलदार यांनी 25 हजारांची लाच मागितल्याचे स्पष्ट झाल्याने त्यांच्या विरोधात शहापूर पोलीस ठाण्यात गुन्हा दाखल करण्यात आला आहे. या गुन्ह्याचा पुढील तपास सुरू आहे.