विमानतळावर तटरक्षक दलाचे हेलिकॉप्टर कोसळले

| गुजरात | वृत्तसंस्था |

गुजरातमधील पोरबंदर विमानतळावर तटरक्षक दलाचे हेलिकॉप्टर कोसळले आहे. या अपघातात तीन जणांचा मृत्यू झाला आहे. अपघाताची माहिती मिळताच अग्निशमन दल आणि वैद्यकीय पथक घटनास्थळी पोहोचले. जखमींना तातडीने सिव्हिल हॉस्पिटलमध्ये उपचारासाठी दाखल करण्यात आले.

मिळालेल्या माहितीनुसार, कोस्ट गार्डचे एएलएच ध्रुव हेलिकॉप्टर गुजरातमधील पोरबंदर येथे नियमित प्रशिक्षण उड्डाण दरम्यान क्रॅश झाले. रविवारी (दि.5) दुपारी 12 वाजता कोस्ट गार्डच्या हेलिकॉप्टरला अपघात झाला. हेलिकॉप्टर नेहमीच्या उड्डाणावर होते आणि हेलिकॉप्टर उतरत असताना हा अपघात झाला. लँडिंग दरम्यान हेलिकॉप्टरला आग लागली. जमिनीवर आदळताच हेलिकॉप्टरला आग लागली आणि धुराचे ढग बाहेर येऊ लागले. हेलिकॉप्टरमध्ये दोन वैमानिकांसह एकूण तीन जण होते. या अपघातात तिघांचाही मृत्यू झाला. एएलएच ध्रुव हे हिंदुस्तान एरोनॉटिक्स लिमिटेडद्वारे निर्मित दुहेरी-इंजिन हेलिकॉप्टर आहे. पूर सारख्या लष्करी आणि आपत्कालीन गरजा पूर्ण करण्यासाठी त्याची रचना करण्यात आली होती. ते 2002 पासून सेवेत आहे. अपघाताच्या कारणाचा तपास सुरू करण्यात आला आहे.