पेणमध्ये वाढती गुन्हेगारी

। अलिबाग । विशेष प्रतिनिधी ।
मुंबई-नवी मुंबईला जवळ असलेला पेण परिसर गुन्हेगारीच्या नकाशावर येत असून, येथील स्टेट बँकेचे एटीएम फोडून 56 लाख 34 हजार 800 रुपये चोरणारे आरोपी पोलिसांनी जेरबंद केले आहेत. जानेवारीला घडलेल्या या गुन्ह्याने रायगड पोलिसांपुढे आव्हान निर्माण झाले होते. परंतु, स्थानिक गुन्हे अन्वेषण विभागाने अथक प्रयत्न करून परराज्यातील चोरट्यांना अटक केले.

17 जानेवारी 2022 रोजी मध्यरात्रीच्या ही घटना घडली होती. चोरट्यांनी शहराच्या मध्यवस्तीत असलेले एटीएम गॅस कटरच्या साह्याने फोडून 56 लाख 34 हजार 800 रुपयांची रोकड लंपास केली होती. तेव्हापासून या आरोपींचा शोध सुरु होता. अनेक प्रयत्न करूनही गुन्ह्यातील सापडत नव्हते. ही बाब लक्षात घेऊन पोलीस अधीक्षक सोमनाथ घार्गे आणि अप्पर पोलीस अधीक्षक अतुल झेंडे यांनी स्थानिक गुन्हे अन्वेषण विभागाला या प्रकरणाचा समांतर तपास करण्याचे निर्देश दिले होते. यानंतर पोलीस निरीक्षक दयानंद गावडे यांच्या पथकांनी खबर्‍यांमार्फत माहिती संकलित करण्याचे काम सुरु केले होते.

याच तपासादरम्यान हरियाणातील तावडू पोलीस ठाण्यात एका दरोड्याच्या गुन्ह्यात दोन आरोपींना अटक माहिती मिळाली. या दोघांचा पेण येथील एटीएम चोरी प्रकरणात सहभाग असल्याची खबर स्थानिक गुन्हे अन्वेषण विभागाला मिळाली. त्यांनी तात्काळ एक पथक हरियाणा येथे रवाना केले. दोन्ही आरोपींची चौकशी केली असता त्यांनी एटीएम चोरी प्रकरणात सहभाग असल्याचे कबूल केले. यानंतर वसिम अकरम अख्तर हुसेन, माजीद जुम्मा खान या दोघांना ताब्यात घेतले. त्यांच्याकडून केलेल्या चौकशीत या प्रकरणातील आणखीन दोन आरोपी निष्पन्न झाले. यानंतर पोलिसांनी हसन खान, साकीर अब्दुल रहीम खान या दोघांना अटक केली. हे सर्वजण हरियाणामधील पुन्हाना तालुक्यातील रहिवासी आहेत.