एकदिवसीय वर्षा सहलीचा ट्रेंड; पर्यटकांची गर्दी
| नेरळ | प्रतिनिधी |
माथेरान या थंड हवेच्या ठिकाणी वर्षा सहलीसाठी पर्यटकांची गर्दी होऊ लागली आहे. त्यात माथेरानमध्ये येणाऱ्या पर्यटकांची ‘एकदिवसीय पर्यटन’ ही नवीन ट्रेंड दिसून येत आहे. त्यामुळे वर्षा सहलींच्या निमित्ताने माथेरानमधील पर्यटन उन्हाळ्यापेक्षा पावसाळ्यात अधिक बहरलेले दिसून येत आहे.
मागील काही वर्षांपासून वर्षा सहल हा प्रकार तरुणाईमध्ये जोर धरू लागला आहे. त्यातच अतिउत्साही तरुणांमुळे अनेकवेळा अपघातही होत असतात. परिणामी रायगड जिल्ह्यात काही ठिकाणी पर्यटकांना बंदी केली गेली आहे. त्यामुळे पर्यटक सुरक्षित पर्यटनस्थळांच्या शोधात असतात. त्याकरिता ते माथेरानकड धाव घेताना दिसत आहेत. कारण माथेरानमध्ये काळजी घेतली तर अति धोकादायक असे कोणतेही ठिकाण नाही. दरम्यान, माथेरानमधील गर्द हिरवीगार वनराई पर्यटकांचे आकर्षण ठरत आहे. सह्याद्री पर्वत रांगांमधील अतिशय घनदाट अरण्यामुळे येथे पाऊस देखील जोरदार कोसळत असतो. या पावसाची मज्जा आणि आनंद लुटण्यासाठी पर्यटकांची पावले माथेरानकडे वळत आहेत. त्यामुळे माथेरानमध्ये कुठेही फिरले तरी पावसात भिजण्याचा आनंद मिळतो. वनराईमधून अचानक येणारा पाऊस आणि दाट धुके असा वेगळा अनुभव पर्यटकांना मिळतो. त्यामुळे पर्यटकांनी माथेरानकडे आपली पाऊले वळवली आहेत.
येथील हिरव्यागार डोंगर रांगामध्ये वारा आणि धुक्याच्या खेळात पावसाच्या संततधारेत माथेरानमध्ये अनेक पर्यटक स्वतःला हरवून घेत असतात. त्यामुळे माथेरानमधील पाऊस अनुभविण्यासाठी पर्यटक नेहमी येथे येत असतो. माथेरानमध्ये मागील काही वर्षांमध्ये झालेल्या प्रचंड जंगल तोडीमुळे येथे पावसाचे प्रमाण कमी झाले होते. मात्र, यंदा दि.28 जून पासून सुरु झालेला पाऊस अद्याप थांबलेला नाही. मात्र, माथेरान उंच डोंगरावर वसले असल्याने येथे कोसळणाऱ्या पावसाची तीव्रता अधिक जाणवत नाही. जुलै महिन्यात पावसाने मोठ्या प्रमाणात बॅटिंग सुरू केली आहे. जुन्याजाणत्या लोकांच्या सांगण्याप्रमाणे आषाढ महिन्यात येथे जोरदार पाऊस कोसळत असतो. पावसाने अवघ्या 10 दिवसांत 2000 पेक्षा अधिक मिली पावसाची नोंद केली आहे. त्यामुळे वर्षा सहलीसाठी येणारे पर्यटक खुश आहेत.