पेण कनिष्ठ न्यायालयात ई-फायलिंग सेंटर

न्यायमूर्ती रुबिना मुजावर हस्ते उद्घाटन संपन्न

| रायगड | प्रतिनिधी |

सर्वोच्च न्यायालयाच्या संकल्पनेनुसार न्यायालयांचे कामकाज आता ‌‘पेपरलेस’ पद्धतीने होणार आहे. यासाठी जिल्हा अलिबाग न्यायालयात ई-फायलिंग यंत्रणा कार्यान्वित झाली असून, महाडपाठोपाठ पेण कनिष्ठ न्यायालयात शनिवारी ई-फायलिंग सेंटरचे उद्घाटन न्यायमूर्ती रुबिना मुजावर, सह. न्यायमूर्ती प्रितेश देशमुख आणि जिल्हा ई-फायलिंग सेंटर प्रमुख अमित देशमुख यांच्या उपस्थितीत संपन्न झाले. रायगड जिल्ह्यातील हे न्यायालयीन कामकाजातील तिसरे सेंटर पेण न्यायालयात सुरू झाले आहे. 14 तालुका न्यायालयात ही प्रणाली कार्यान्वित होणार असल्याचे यावेळी सांगण्यात आले.

उच्च न्यायालय व महाराष्ट्र-गोवा वकील संघाच्या पुढाकाराने ही प्रणाली कार्यान्वित करण्यात येत आहे. पहिल्या टप्पात प्रमुख जिल्हा न्यायालयात ई-फायलिंग व फॅसिलिटी केंद्र कार्यान्वित करण्यात आले आहे. यामुळे आता दाखल होणारी नवीन प्रकरणे (खटले) ऑनलाईन पद्धतीने दाखल करण्यात येत आहेत. यासाठी सुविधा केंद्रात 2 संगणक, 2 स्कॅनर प्रिंटर, वेब कॅमेरा, माईक ही उपकरणे बसविण्यात आली आहे. केंद्रात वकिलांच्या मदतीसाठी दोन परिचालक नियुक्त करण्यात आले आहेत.

या ई-फाईलिंग सेंटरच्या उद्घाटनप्रसंगी पेण बार असोसिएशनचे अध्यक्ष ॲड. बी.व्ही.म्हात्रे, सचिव ॲड. आर.आर. म्हात्रे, खजिनदार ॲड. सुयोग कडू, ज्येष्ठ सदस्य रविकांत म्हात्रे, स्वागत पाटील, वनश्री कामत, सेंटरच्या संचालिका ॲड. विद्या म्हात्रे, टेक्निशियन ॲड. अमित गावंड, संकेत टक्के, मनीष म्हात्रे आणि बार असोसिएशनची सर्व वकील मंडळी उपस्थित होती.