सायकल दिनानिमित्त ‌‘सायकल कट्टा’ची स्थापना

विजयभाई मेथा यांच्या प्रेरणेतून नवा उपक्रम; पर्यावरणपूरक वाहतुक करण्याचा प्रयत्न

| माणगाव | प्रतिनिधी |

आरोग्यदायी जीवनशैली, पर्यावरण संवर्धन आणि सामाजिक एकात्मता यांचा संदेश देणाऱ्या जागतिक सायकल दिनानिमित्त माणगावात सायकलप्रेमींसाठी एक अभिनव आणि प्रेरणादायी उपक्रम सुरू करण्यात आला आहे. सायकल कट्टा या नावाने स्थापन झालेला हा उपक्रम केवळ सायकलिंगपुरता मर्यादित नसून निरोगी जीवन, सकारात्मक विचार, पर्यावरण संरक्षण आणि मैत्रीची नाती अधिक दृढ करणारे व्यासपीठ ठरणार आहे.

या उपक्रमाचे नेतृत्व माणगावातील ज्येष्ठ आणि प्रतिष्ठित नागरिक खेमचंद चुनीलाल तथा विजय मेथा यांच्या मार्गदर्शनाखाली होत आहे. विशेष म्हणजे, वयाच्या 72 व्या वर्षीही ते नियमित सायकलिंग करून तरुणांसमोर आदर्श निर्माण करत आहेत. त्यांची ऊर्जा, शिस्त आणि आरोग्याबाबतची जागरूकता अनेकांसाठी प्रेरणादायी ठरत आहे.

आजच्या धकाधकीच्या आणि तणावपूर्ण जीवनात अनेकजण शारीरिक हालचालींपासून दूर जात असल्याचे चित्र दिसून येते. वाढते प्रदूषण, जीवनशैलीजन्य आजार आणि मानसिक ताण या समस्यांवर सायकलिंग हा अत्यंत सोपा, किफायतशीर आणि प्रभावी उपाय मानला जातो. याच पार्श्वभूमीवर सायकल कट्टा हा उपक्रम नागरिकांना नियमित व्यायामाची सवय लावण्याबरोबरच पर्यावरणपूरक वाहतुकीकडे वळविण्याचा प्रयत्न करणार आहे. उपक्रमाच्या माध्यमातून नियमित सायकल राईड्स, आरोग्यविषयक जनजागृती, पर्यावरण संवर्धन मोहिमा तसेच सामाजिक बांधिलकी जपणारे विविध कार्यक्रम आयोजित करण्यात येणार असल्याची माहिती आयोजकांनी दिली आहे.

यावेळी आयोजकांनी नागरिकांना आवाहन करताना म्हटले की, दररोज थोडं पेडल मारूया, निरोगी आयुष्य आणि हरित भविष्य घडवूया. जागतिक सायकल दिनाच्या निमित्ताने प्रत्येकाने सायकलला आपल्या दैनंदिन जीवनाचा भाग बनवून स्वतःचे आरोग्य जपण्याबरोबरच पर्यावरण संवर्धनासाठीही हातभार लावावा लावण्याचे आवाहन आयोजकांनी केले आहे. अधिक माहितीसाठी नाव नोंदणी व संपर्क विजय मेथा 8087562133, स्नेहल मेथा कुराडे 8888373032, प्राची झेमसे – 9970898982 याच्यांशी संपर्क साधण्यास आयोजकांनी सांगितले आहे.

निःशुल्क प्रवेश
या समूहामध्ये महिला, पुरुष, युवक, विद्यार्थी तसेच ज्येष्ठ नागरिक अशा सर्व वयोगटांतील नागरिकांना सहभागी होण्याचे आवाहन करण्यात आले आहे. विशेष म्हणजे या उपक्रमासाठी कोणतेही शुल्क आकारले जाणार नसून प्रवेश पूर्णपणे विनामूल्य ठेवण्यात आला आहे.