वीज कर्मचाऱ्यांचा फटका कारखानदारांना
तळोजा औद्योगिक वसाहतीमध्ये रात्री पासून बत्ती गुल
। पनवेल । दीपक घरत ।
महावितरणच्या विविध कर्मचारी संघटनांच्यावतीने ७२ तास संपाची हाक देण्यात आली आहे. कर्मचाऱ्यांनी घेतलेल्या निर्णयानुसार बुधवारी ( ता.४) सकाळ पासूनच संपाला सुरवात झाली आहे. ७२ तासांच्या या संपाला सकाळी सुरवात झाली असली तरी तळोजा औद्योगिक वसाहती मधील वीज रात्री एक वाजल्यापासूनच बंद झाली असून, पुढील ७२ तासात वीज पुरवठा पूर्ववत न झाल्यास कारखानदारांना मोठ्या आर्थिक नुकसानाचा सामना करावा लागण्याची शक्यता आहे.
जवळपास ९५० लहान मोठे कारखाने असलेल्या तळोजा औद्योगिक वसाहतीमधील वीज पुरवठा मंगळवारी ( ता.3) रात्री पासूनच खंडित झाला आहे. वीज पुरवठा खंडित झाल्याने अनेक कारखान्यातील उत्पादन प्रक्रिया ठप्प झाली असून, काही कारखानदार जनरेटर च्या माध्यमातून उत्पादन प्रक्रिया सुरु ठेवण्याचा प्रयत्न करत आहेत. मात्र जनरेटर च्या वापराला देखील मर्यादा असल्याने आणि जनरेटला अतिरिक्त इधनाची गरज भासत असल्याने महावितरण विभागाच्या कर्मचाऱ्यांच्या संपावर तोडगा न निघाल्यास कारखानदारांचे हजारो कोटी रुपयांचे नुकसान होण्याची भीती तळोजा इंडस्ट्रीयलिस्ट असोसिएशन चे अध्यक्ष सतीश शेट्टी यांनी व्यक्त केली आहे.
कोल्डस्टोरेज मध्ये साठवलेल्या करोडो रुपये किमतीच्या औषधांची आणि खाद्य पदार्थांची नासाडी होण्याची शक्यता वर्तवली जात आहे. तळोजा औद्योगिक वसाहतीत अन्न पदार्थ तसेच औषध साठवणूक करण्यासाठी वापरात असलेले जवळपास ५३ कोल्ड स्टोरेज आहेत. या ठिकाणी करोडो रुपयांच्या औषधानचा तसेच अन्न पदार्थांचा साठा आहे. पुढील काही तासात वीज पुरवठा पूर्ववत न झाल्यास हा साठा खराब होण्याची शक्यता वर्तवण्यात येत आहे.
जनरेटर वर तग धरण्याचा प्रयत्न
काही कारखानदार आणि कोल्ड स्टोरेज मालकांनी जनरेटर चा वापर सुरु केला आहे.मात्र जनरेटर चा वापर काही तासांपुरता करता येणे शक्य असून, जनरेटर ला लागणाऱ्या अतिरिक्त इधना करता कारखानदारांचे लाखो रुपये खर्च होण्याची शक्यता आहे.
कारखान्यांचा खंडित झालेला वीज पुरवठा पूर्ववत करण्यात यावा या मागणी साठी महावीतरण विभागाच्या अधिकाऱ्यांशी संपर्क साधला मात्र वीज पुरवठा पूर्ववत करण्यात आपण हतबल असल्याचे उत्तर अधिकाऱ्यांनी दिले आहे. – प्रशांत रणवरे, पदाधिकारी, राष्ट्रवादी काँग्रेस पक्ष.
